АҚШ президенти Дональд Трамп Киев АҚШга 400-500 миллиард доллар товон тўлаш мажбурияти бўйича тез орада келишувга эришишга умид қилаётганини айтди. Бу ҳақда euromedia24.com нашри хабар берди.
"Менимча, биз жуда яқинмиз. Улар шуни хоҳлашади. Бу уларга ёқади. Бу катта келишув. Биз келишувларни имзолаймиз, умид қиламанки, қисқа вақт ичида бу бизга 400-500 миллиардни қайтаришни таъминлайди," - деди Трамп.
Трампнинг қўшимча қилишича, АҚШ "жуда узоқда" бўлган мамлакатга пул сарфлайди, бироқ пулни қайтариб олмайди. Оқ уй раҳбарининг таъкидлашича, Вашингтон энди буни истамайди.
Эслатиб ўтамиз, Владимир Зеленский аввалроқ АҚШ молия вазири Скотт Бессент олиб келган нодир ер ресурслари тўғрисидаги шартномани имзолашдан бош тортган эди. Бундан ташқари, у Трампнинг 500 миллиард долларни қайтариш талабини "жиддий бўлмаган суҳбат" деб атаган эди.
Бир кун аввал Трамп Украина ҳукумати АҚШ билан фойдали қазилмаларни қазиб олиш бўйича келишувни имзолашдан бош тортса, кўплаб муаммоларга дуч келишини айтган эди. Унинг миллий хавфсизлик бўйича маслаҳатчиси Майкл Уолтс эса Зеленский яқин келажакда битимни имзолашини таъкидлади.
