Аввалроқ Тошкент шаҳар ҳокимлиги пуллик автотураргоҳ учун ҳақ тўламаганлик учун маъмурий жавобгарлик белгилаш таклиф этилаётган қонун лойиҳасини ишлаб чиққани ҳақида хабар берган эдик. Жаримани БҲМнинг 2 баравари миқдорида белгилаш таклиф қилинмоқда (ҳозир 824 000 сўм, 1 сентябрдан - 880 000 сўм).
Ўзбекистон Халқ демократик партияси депутатлари ушбу лойиҳани қабул қилиш мумкин эмаслигини кўрсатувчи баёнот билан чиқишди.
Қайд этилишича, Конституциянинг 98-моддасига мувофиқ, Тошкент шаҳар ҳокимлиги қонунчилик ташаббуси ҳуқуқига эга бўлган субъектлар сирасига кирмайди. Кодексларга ўзгартишлар киритиш тўғрисидаги қонун лойиҳалари фақат Конституцияда тўғридан-тўғри кўрсатилган субъектлар томонидан киритилиши мумкин.
Бундан ташқари, хусусий пуллик автотураргоҳ оператори хизматларига ҳақ тўлаш бўйича фуқаролик-ҳуқуқий мажбуриятни бажармаганлик учун маъмурий жавобгарликни жорий этиш қонунчиликка зиддир. Фуқаролик кодексига мувофиқ, пуллик автотураргоҳ хизматларига ҳақ тўлаш мажбурияти фойдаланувчи ва автотураргоҳ оператори ўртасидаги муносабатлардан келиб чиқади. Бундай муносабатлар ўз ҳуқуқий табиатига кўра фуқаролик-ҳуқуқий муносабатлардир.
"Ушбу вазиятда маъмурий жавобгарликни жорий этиш ўрнига қонунчиликда назарда тутилган фуқаролик-ҳуқуқий механизмларни қўллаш зарур, яъни автотураргоҳ оператори қарздорликни суд тартибида ундириши лозим," - дея таъкидлади депутатлар.
Шунингдек, маъмурий жавобгарлик чоралари (жарималар) давлат органлари томонидан фақат оммавий ва жамоат манфаатларини ҳимоя қилиш мақсадида қўлланилиши мумкинлиги таъкидланади. Тижорат ташкилотининг даромадларини ундиришни таъминлаш учун давлат мажбурловидан фойдаланиш ҳуқуқий давлат тамойилларига зиддир.
Депутатлар ҳайдовчиларнинг атиги 2-3 фоизи пуллик автотураргоҳлар учун ҳақ тўлаши ҳақидаги даъво жамоатчиликда жиддий шубҳа уйғотаётганига эътибор қаратди.
ХДП аввалроқ таъкидлаганидек, ҳокимлик шу пайтгача пуллик автотураргоҳлардан тушумлар ва давлат бюджетига ўтказилган маблағлар ҳажми тўғрисидаги маълумотларни ошкор қилмаган.
"Ўзбекистон Халқ демократик партияси ижро этувчи ҳокимият органларини жарима ва жазолар жорий этиш билан эмас, балки аҳоли учун муносиб шароитлар яратиш билан шуғулланишга чақиради," - дея хулоса қилди депутатлар.
Изоҳ