Ўзбекистонда катта ёшли аҳолининг атиги 4 фоизи жамғарма ёки муддатли депозит ҳисобварақларига эга. Шу билан бирга, катта ёшли фуқароларнинг 86 фоизида банк ҳисобварақлари очилган. Бу ҳақда Марказий банкнинг 2025 йил учун молиявий қамров индекслари бўйича пилот ҳисоботида айтилган.
Ҳисоботга кўра, жамғарма маҳсулотларидан фойдаланиш имконияти индекси 56 баллни ташкил этган. Бу учта асосий йўналиш орасидаги энг паст кўрсаткичдир. Таққослаш учун, тўлов хизматларидан фойдаланиш имконияти 69 балл, кредит маҳсулотлариники эса 64 балл билан баҳоланган.
«Банк тизими томонидан базавий қамров даражаси юқори бўлишига қарамай, маблағларни жамғариш учун мўлжалланган махсус маҳсулотлардан фойдаланиш ҳали кенг тарқалмаган», — дея таъкидлайди экспертлар.
Шу билан бирга, депозит ҳисобварақларига эга бўлган фуқаролар орасида фаоллик даражаси анча юқори экани қайд этилган. Ҳисобот даври якунларига кўра, депозит ҳисобварақларининг 66 фоизи фаол ҳисобланган — сўнгги 12 ой давомида улар бўйича учтадан ортиқ операция амалга оширилган.
Натижада жамғарма маҳсулотларидан фойдаланиш индекси 68 баллни ташкил этган. Бу улардан фойдаланиш имконияти индексидан (56 балл) сезиларли даражада юқори.
Жамғарма маҳсулотлари сифати индекси эса 53 баллни ташкил этган. Бунда, жумладан, жисмоний шахсларнинг янги муддатли депозитлари бўйича ўртача вазнланган фоиз ставкасининг жозибадорлиги ҳамда депозит хизматлари бўйича шикоятлар даражасининг пастлиги инобатга олинган.
Изоҳ