Шавкат Мирзиёев Хоразм вилоятига ташрифи чоғида Ўзбекистонда иккинчи атом электр станциясини қуриш бўйича тайёргарлик ишлари олиб борилаётганини маълум қилди.
«Сиз ўзингиз биласиз, биз қачонлардир Жиззахда атом электр станцияси бўлади, Ўзбекистонда қачондир АЭС пайдо бўлади, деб тасаввур қила олармидик?
Бугун сизларга бир сирни очмоқчиман. Яқин вақт ичида биз иккинчи станция бўйича ҳам катта тайёргарлик ишларини олиб бормоқдамиз», — деди давлат раҳбари.
Президент мамлакатга сармоя киритишга тайёр инвесторлар келаётганини таъкидлади. Унинг сўзларига кўра, инвесторларни биринчи навбатда электр энергияси нархи ва кафолатлар қизиқтирмоқда.
«Шунинг учун, агар биз 2030 йилгача мўлжалланган мамлакатимизни ривожлантириш стратегиясини амалга оширмасак, барча ишларни тўғри йўлга қўймасак, кафолатланган электр таъминотини таъминламасак ва электр энергияси таннархини пасайтириш чораларини кўрмасак, бизга ким келиб сармоя киритади? Ҳеч ким. Ҳеч қачон», — деди Шавкат Мирзиёев.
Иккинчи АЭС қурилиши режалаштирилаётган жой, станция қуввати ва лойиҳани амалга ошириш муддатлари ҳозирча очиқланмаган.
Эслатиб ўтамиз, Ўзбекистондаги биринчи интеграциялашган АЭС Жиззах вилоятининг Фориш туманида қурилмоқда.
АЭС иккита ВВЭР-1000 3+ авлод реакторли энергоблок ҳамда ҳар бири 55 МВт қувватга эга иккита РИТМ-200Н реакторли энергоблокдан иборат бўлади.
Станция тўлиқ қувватга чиққач, йилига қарийб 15,4 млрд кВт/соат электр энергияси ишлаб чиқаради. Бу мамлакатдаги умумий электр истеъмолининг 15 фоизидан ортиғини ташкил этади.
Реактор биноси учун бетон асос тайёрлаш ишлари жорий йил март ойида бошланган.
Июнь ойида Санкт-Петербург халқаро иқтисодий форуми доирасида Шавкат Мирзиёев ва Владимир Путин видеоконференция орқали Ўзбекистондаги биринчи интеграциялашган АЭСнинг биринчи энергоблоки қурилишини бошлашга старт берган эди.
Изоҳ