ИИВ хабарига кўра, 2009 йилда туғилган, мактаб ўқувчиси бўлган вояга етмаган шахс интернет-наркодўконда омборчи вазифасини бажариб келган. У Россиядан контрабанда йўли билан олиб кирилган гиёҳвандлик воситаларини Yandex хизмати орқали қабул қилиб, ҳаракатланаётган вақтида Тошкент шаҳрининг Чилонзор туманида ушланган. Унинг арра ускунаси ичига яширилган 180 грамм альфа-PVP синтетик гиёҳвандлик воситаси ашёвий далил сифатида олиб қўйилган.
Тезкор тадбирлар давомида вояга етмаган шахснинг икки нафар жиноий шериги ҳам Чилонзор туманида яширилган синтетик гиёҳвандлик воситаларини олаётган вақтида қўлга олинган.
Уларнинг Telegram аккаунтлари текширилганда, манзилга келишидан аввал яна олти жойга гашиш мойини «закладка» усулида яшириб кетгани аниқланган. Ушбу гиёҳвандлик воситалари ҳам процессуал тартибда расмийлаштириб олинган.
Назорат остида етказиб бериш тадбири давомида жиноий гуруҳнинг бошқа аъзолари ҳам қўлга олинган. Жумладан, 1992 йилда туғилган шахс интернет-наркодўконда омборчи вазифасини бажаргани аниқланган. У Россиядан контрабанда йўли билан олиб кирилган гиёҳвандлик воситаларини Yandex хизмати орқали қабул қилиб, яшаш хонадонига олиб кетаётган вақтида ушланган.
Унинг перфоратори ичига яширилган 500 грамм альфа-PVP, шунингдек, бошқа хонадонда яширилган яна 50 грамм альфа-PVP ашёвий далил сифатида олиб қўйилган.
Кейинги тезкор тадбирлар Тошкент шаҳрининг Юнусобод туманида давом эттирилиб, жиноий гуруҳнинг яна бир аъзоси қўлга олинган. 1999 йилда туғилган ва муқаддам Жиноят кодексининг 169-моддаси 3-қисми билан судланган ушбу шахс Telegram-даги наркодўконда омборчи бўлиб ишлаган. У куратори томонидан кўрсатилган манзилдан 500 грамм альфа-PVPни олаётган вақтида ушланган.
Ҳолат юзасидан жиноий ҳаракатларни содир этган шахсларга нисбатан Ўзбекистон Республикаси Жиноят кодексининг 273-моддаси 6-қисми «А» банди билан жиноят иши қўзғатилган ва уларга нисбатан қамоқ эҳтиёт чораси қўлланган.
Изоҳ