"Тошкент-АЭРО" ихтисослаштирилган божхона комплекси Контрабандага қарши курашиш бўлими ходимлари томонидан гиёҳванд моддаларнинг ноқонуний айланишига қарши курашиш доирасида навбатдаги тезкор-қидирув тадбири ўтказилди. Бу ҳақда ДБҚ матбуот хизмати хабар берди.
Тошкент шаҳрида фуқаронинг кузатувга олинган автомобили тўхтатилиб, кўздан кечирилди. Маълум бўлишича, болалар шарбати қутисида умумий оғирлиги тахминан 11 грамм бўлган 20 та гиёҳванд модда ўрами бўлган.
Кейинроқ фуқаронинг турар жойи холислар иштирокида кўздан кечирилди. У ерда умумий оғирлиги 3,15 кг бўлган героин, мефедрон, марихуана ва бошқа турдаги гиёҳванд моддалар топилган.
Шундан сўнг тезкор тадбирлар давом эттирилиб, тақиқланган моддаларнинг ҳақиқий эгаси бўлган фуқаро қўлга олинди.
Ҳозирда мазкур ҳолат юзасидан Жиноят кодексининг тегишли моддалари билан жиноят иши қўзғатилиб, тергов ҳаракатлари олиб борилмоқда.
Изоҳ