Ўзбекистонда ҳаво транспорти орқали гўшт импорт қилиш бўйича амал қилиб келаётган имтиёз йил охиригача узайтирилди. Бу импорт ҳажмини ошириш ва ички бозорда нархларнинг кескин ўсишининг олдини олишга хизмат қилади.
Маълум қилинишича, қишлоқ хўжалиги рўйхатга олиш якунларига кўра, мамлакатдаги чорва моллари сони аввалги ҳисоб-китобларга нисбатан кам экани аниқланган. Хусусан, йирик шохли қорамоллар сони 2,1 миллион бошга, қўй ва эчкилар эса 1,5 миллион бошга кам чиққан.
Қашқадарё вилоятида йирик шохли қорамоллар сони 171 минг бошга, қўй ва эчкилар эса 288 минг бошга кам қайд этилган. Бу эса ҳудудда тахминан 50 минг тонна гўшт ва 120 миллион литр сут етишмаслигига олиб келиши мумкин.
Чорвачиликни ривожлантириш мақсадида май ойида Қишлоқ хўжалиги жамғармасидан 1 триллион сўм ажратилган. Шунингдек, Тикланиш ва тараққиёт жамғармасидан қўшимча 50 миллион доллар йўналтирилади.
Ушбу маблағлар ҳисобидан фермерлар қўллаб-қувватланади. Чорвачилик комплекслари ташкил этиш учун 5 миллиард сўмгача, наслдор чорвачиликни ривожлантириш учун эса 20 миллиард сўмгача кредит ажратилади. Кредитлар 10 йил муддатга, 4 йиллик имтиёзли давр билан берилади.
Йиғилишда йил якунига қадар хориждан 100 минг бош йирик шохли қорамол ҳамда 150 минг бош қўй ва эчки олиб келиниши режалаштирилгани ҳам маълум қилинди.
Изоҳ