“Кимдир 15 суткага кириб кетади. Лекин биз кичкина жарима билан қутилдик” — қоидабузарлигини мақтанган йигит узр сўради

Аввалроқ, Тошкентда BМW автомобили ҳайдовчиси ЙПХ ходимини уриб кетгани ҳақида хабар берилганди. Шундан сўнг, ижтимоий тармоқда бир видео тарқалди. Унда ўзини автотунинг компания ишчиси деб таништирган йигит БМW’да кўчада қоидаларни бузиб ҳаракатланиши айтганди. 

“Кимдир 15 суткага кириб кетади. Лекин биз кичкина жарима билан қутилдик”, - дейди у.

Шундан сўнг, ижтимоий тармоқда ЙПХ ходимини ушбу йигит уриб юборгани ҳақида хабарлар тарқалди. Йигит эса мазкур хабарлар нотўғри эканлиги, ЙПХ ходимини у уриб юбормаганини айтди. 

Унинг айтишича, у фақат транспорт воситаларини тунинг қилиш ва хизмат кўрсатиш билан шуғулланиб келгани маълум бўлди. Ижтимоий тармоқлардаги резонанс эса, ушбу боланинг мақтанчоқлиги ва ижтимоий тармоқларда PR қилмоқчи бўлганлиги оқибатида тайёрланган савиясиз контенти сабаб юзага келган.

“Инстаграм ва бошқа интернет нашрларида чиқдики, биз ёшларни мана шундай нарсаларга тарғиб қилаётган эканмиз. Авваламбор, нотўғри иш қилганмиз. Интервью қўйган одамнинг монтажини текширибгина қўйишимиз керак эди, аммо шу нарса ўтиб кетиб қолди. Х5 ва Х7 BМW русумли автомобиллари вазиятига қайтадиган бўлсак, мана шу машиналар бизнинг тунинг ательемиздан чиққан.

Қоидаларга бўйсунмаслик ҳақидаги видеони ўзимнинг ижтимоий тармоқларимга видеони жойлаганман ва менга қонуний 60 та энг кам иш ҳақи миқдорида жарима ёзиб беришган. Интервьюда айтиб кетганманки, бизга бор-йўғи 10 та энг кам иш ҳақи миқдорида жарима ёзиб беришган. У бор-йўғи мақтанчоқлик эди ва PR орқасидан келиб чиқиб айтилган.

Биз бу нарсани умуман тарғиб учун қилмагандик. Eнгил қараганимиз учун ҳозир биз мана шу нарсанинг азиятини чекяпмиз. Ҳар қандай нотўғри хабар тарқатгани учун ўзининг жазоси бор экан. Ўша ДАН ходимининг ўрнида бизнинг оталаримиз бўлиши мумкин эди. Ҳаммадан узр сўраймиз”, - дейди у.

Эслатиб ўтамиз, ЙПХ ходимининг уриб юборилиши билан тугаган ЙТҲни Тошкентдаги хусусий мактабнинг 10-синф ўқувчиси содир этгани аниқланган.

У BMW M4 автомашинасини ҳайдовчилик гувоҳномасиз бошқариб, Миробод тумани Миробод кўчаси бўйлаб ҳаракатланиб келаётган вақтда Тошкент шаҳар ИИББ ЙҲХБ ЙПХ инспекторини уриб юборган. ЙПХ инспектори тан жароҳатлари билан шифохонага ётқизилган.