Тошкент вилоятида профилактика инспекторини 18 ёшли йигит пичоқлади. Бу ҳақда вилоят ИББ Матбуот хизмати хабар берди.
Олмалиқ шаҳрида профилактика инспектори Азамат Акбаров ва унинг ёрдамчисига навбатчилик қисмидан жанжал бўлаётгани ҳақида хабар келиб тушган.
Шундан сўнг, улар воқеа жойига етиб бориб, 5–6 нафар фуқаро иштирокидаги жанжални бартараф этган.
Аммо, жанжал иштирокчиларини хизмат машинасига ўтказиб, олиб кетмоқчи бўлганда 18 ёшли М.У. инспекторнинг ортидан пичоқ билан зарба берган. Оқибатда, у билак соҳасидан яраланган.
Қайд этилишича, Олмалиқ шаҳрида яшовчи М.У. қўлга олинган. У бундан беш кун аввал 2004 йилда туғилган А.А. билан дўкондан 3,5 млн сўмлик мобил телефонга керакли жиҳозларни ўғирлагани ҳам аниқланган.
Ҳолат юзасидан жиноят иши қўзғатилиб, суриштирув ишлари олиб борилмоқда.
