Футбол бўйича Ўзбекистон миллий терма жамоасига янги тайинланган бош мураббий Фабио Каннаваро Малайзияда Уругвайга қарши ўртоқлик ўйинидан сўнг матбуот анжуманида жамоанинг илк ўйини ҳақида ўз фикрларини билдирди.
"Афсуски бу ўйинда 9 нафар футболчимиз жароҳат сабаб қатнаша олмади. Менда бор футболчиларни кўриб олиш, улар билан вақт ўтказиш мен учун жуда муҳим эди. Йигитларнинг ҳаракатларидан мамнунман, улар борини бериб ўйнашди.
2 кун аввал Малайзияга келдик ва майдонга чиқдик. Бу вақт ичида дам олишнинг деярли иложи йўқ. Бундай баҳсларда рақиб дарвозасини ишғол қилиш жуда муҳим. Аввалроқ гол уришимиз ҳам мумкин эди, яхши вазиятга эга бўлдик. Тўпсиз ўйинда ижобий ҳаракат қилдик. Уругвайни қийин вазиятга солиб қўйиш осон эмас, уларнинг кўпчилиги Бразилия чемпионатида тўп тепишади. Қўл остимда жуда яхши жамоа бор, уни янада кучайтиришнинг иложи бор" - дейди мураббий.
Унинг айтишича, биринчи гол офсайддан урилди. Иккинчисида рақибга кўп ҳудудни топшириб қўйилди. Ўзбекистонлик футболчилар жарима майдончаси ичида бир-бирига яқин ўйнаши керак. Эътибор ва концентрация жуда муҳим.
"Танаффусда ҳам йигитларга биринчи ўн беш дақиқалик муҳимлигини айтиб ўтдим. Диққатимизни бир жойга тўплай олмасак, нима бўлиши мумкинлигини бугун кўрдик", - дейди Каннаваро.
Каннаваро Ургувай терма жамоасининг футболчилари Ўзбекистон МТЖ футболчиларидан жисмоний жиҳатдан анча олдинда экани ҳақидаги фикрни тасдиқлаб, буни ўнглаш учун яна 8 ой вақт борлигини эслатди. Унинг айтишича, бу фақат машғулотга эмас, кўп нарсаларга боғлиқ. Овқатланиш, машғулот, ўз вақтида ухлаш кабилар. Мундиалга босқичма-босқич тайёргарлик кўриш керак. Жаҳон чемпионати қийин бўлади.
Шунингдек, Ўзбекистон МТЖ ноябрь ойида Дубайда иккита ўртоқлик учрашуви ўтказади. Каннаваро Ўзбекистонда қолиб, миллий чемпионат баҳсларини кузатишини ва мураббийлар билан танишишини айтди.
Эслатиб ўтамиз, 13 октябрь куни футбол бўйича Ўзбекистон миллий терма жамоаси ФИФА кунларидаги иккинчи назорат учрашувини Уругвай миллий терма жамоасига қарши ўтказди ва 1:2 ҳисобида мағлуб бўлди.
Изоҳ