Бугун, 12 март куни Париждаги Фахрийлар уйида Францияга давлат ташрифини амалга ошираётган Ўзбекистон президенти Шавкат Мирзиёевни расмий кутиб олиш маросими бўлди. Бу ҳақда Ўзбекистон президенти Матбуот хизмати хабар қилди.
Мамлакат етакчисини Франция президенти Эммануэль Макрон кутиб олди.
Майдонда олий мартабали меҳмон шарафига Франция гвардияси, қуруқлик қўшинлари, ҳарбий-денгиз ва ҳарбий-ҳаво кучлари хизматчиларидан иборат фахрий қоровул саф тортди. Ҳарбий оркестр ижросида икки мамлакат мадҳиялари янгради. Гвардиячилар Ўзбекистон раҳбари олдидан тантанали юриб ўтди.
Президентлар фахрий қоровул сафи олдидан ўтдилар ва расмий делегациялар аъзоларини қутладилар. Сўнг Ўзбекистон раҳбари отлиқ гвардиячилар ва мотоциклчилар ҳамроҳлигида олий даражада музокара ўтказиш учун Франция Президентининг қароргоҳи - Елисей саройига йўл олди.
