Шавкат Мирзиёев Маъмурий жавобгарлик тўғрисидаги кодексга ўзгартиш ва қўшимчалар киритиш ҳақидаги қонунни парламентга қайтарди. Бу ҳақда сешанба куни Олий Мажлис Қонунчилик палатаси мажлисида Олий Мажлис Қонунчилик палатасининг Коррупцияга қарши курашиш ва суд-ҳуқуқ масалалари қўмитаси аъзоси Гулшана Худоярова маълум қилди.
Аввалроқ қонун лойиҳаси 27 январь куни Қонунчилик палатаси томонидан қабул қилинган, май ойида Сенат томонидан маъқулланган ва Президент Администрациясига юборилган эди. Ҳужжатда харидордан автомобиль одометри кўрсаткичлари ўзгартирилгани ёки одометрнинг ўзи алмаштирилгани ҳақидаги маълумотни яширганлик учун маъмурий жавобгарлик жорий этиш таклиф қилинган.
Бунинг учун Маъмурий жавобгарлик тўғрисидаги кодексни 178−2-модда билан тўлдириш таклиф этилган. Сенатда таъкидланганидек, ушбу норма автомобиль бозоридаги фирибгарлик ҳолатларининг олдини олиш, автомобилларни сотишдаги суиистеъмолликларга барҳам бериш ҳамда истеъмолчиларнинг ишончли маълумот олиш ҳуқуқини таъминлашга қаратилган.
Ҳужжатда, шунингдек, транспорт воситасини бошқариш ёки ов қилиш ҳуқуқидан маҳрум қилиш муддатини қисқартириш тартибига ўзгартишлар киритилган.
Г. Худоярованинг сўзларига кўра, 8 сентябрь куни давлат раҳбари ҳужжатни ҳар икки палатага «бир қатор концептуал масалалар ва эътирозлар» билан қайтарган.
Эътирозлардан бири ҳозирда Маъмурий жавобгарлик тўғрисидаги кодекснинг янги таҳрири ишлаб чиқилаётгани билан боғлиқ. Президент фармойишига мувофиқ, тегишли вазирлик ва идоралар мутахассислари олимлар билан биргаликда кодекснинг янги таҳрири лойиҳасини тайёрламоқда.
Унда алоҳида процессуал қисм ажратилиб, ишларни кўриб чиқишнинг ҳар бир босқичида иш юритиш нормалари ва тартиби батафсил белгиланиши режалаштирилган.
«Қисқа вақт ичида кодексга иш юритиш тартибига тааллуқли такрорий ўзгартишлар киритилиши амалиётнинг нотўғри шаклланишига, ноаниқлик ва турлича талқинлар юзага келишига олиб келиши мумкин», — деди Г. Худоярова.
Г. Худоярова, шунингдек, қонунда назарда тутилган автомобиль одометрлари кўрсаткичлари билан боғлиқ жавобгарлик масаласига алоҳида тўхталди. У Президент эътирозларида Германия, Польша, Франция, Канада, Жанубий Корея ва бошқа давлатлар тажрибаси келтирилганини айтди.
«Хорижий давлатлар тажрибасидан келиб чиқиб, одометр кўрсаткичларининг ишончсизлиги ҳақида харидорни хабардор қилмаганлик учун эмас, балки одометр ишига ташқи аралашув орқали унинг кўрсаткичларини ўзгартирганлик учун маъмурий жавобгарлик жорий этиш мақсадга мувофиқлиги қайд этилган», — деди қўмита вакили.
Шундай қилиб, эътироз ҳуқуқбузарлик таркибига ёндашувнинг ўзига тааллуқли: жавобгарликни одометр ишига аралашиш билан бевосита боғлаш, унинг кўрсаткичлари ишончсизлиги ҳақида харидорни кейинчалик хабардор қилмаслик эмас, балки асосий мезон сифатида белгиланиши таклиф этилмоқда.
Депутатнинг маълум қилишича, билдирилган эътирозларни қонун лойиҳасининг дастлабки концепцияси доирасида бартараф этишнинг имкони йўқ. Шу муносабат билан Коррупцияга қарши курашиш ва суд-ҳуқуқ масалалари қўмитаси қонунни Қонунчилик палатасида қайта кўриб чиқишдан олиб ташлашни таклиф қилди.
Изоҳ