Тошкент вилояти Олмалиқ шаҳрида яшовчи аёл рухсатсиз уйдаги ширинликларни егани учун 8 ёшли фарзандининг қўлини куйдиргани айтилган хабар ижтимоий тармоқларга сиздирилди. Ушбу ҳолат юзасидан Болалар омбудсмани изоҳ берди.
Аниқланишича, 1991 йилда туғилган Х.А. исмли аёл 2024 йил 30 октябрь куни 2016 йилда туғилган 8 ёшли ўғли Б.А.ни уйдаги ширинликларни рухсатсиз еганлиги сабабли уни гўёки жазолаш мақсадида бармоқлари ораси ва бошқа тана аъзоларига пахта тиқиб, ёққан. Бунинг натижасида боланинг танасида 1 ва 2-даражадаги куйиш юзага келиб, у енгил тан жароҳати олган.
"Олмалиқ шаҳар ИИБ томонидан Х.А.га нисбатан ЖКнинг 110-моддаси (қийнаш) 2-қисми "а" банди бўйича жиноят иши қўзғатилган ва яширингани туфайли унга қидирув эълон қилинган. Жорий йилнинг 7 февраль куни Х.А. процессуал тартибда ушланиб, унга тегишли суд ажрими асосида қамоқ эҳтиёт чораси қўлланилган," - дейилади хабарда.
Маълумот учун, ЖКнинг 110-моддаси 2-қисми "а" бандида назарда тутилган жиноят учун 360 соатдан 480 соатгача мажбурий жамоат ишлари ёки 2 йилдан 3 йилгача ахлоқ тузатиш ишлари ёхуд 2 йилдан 5 йилгача озодликни чеклаш ёки 5 йилгача озодликдан маҳрум қилиш жазоси қўлланилади.
