Ички ишлар вазирлиги Тезкор қидирув департаменти ходимлари томонидан ўтказилган тезкор тадбир давомида одам ўғирлашга уринган икки нафар шахс қўлга олинди.
Маълум қилинишича, департаментга мурожаат қилган фуқаро номаълум шахслар томонидан автомобильга мажбуран ўтқазилиб, олиб қочилганини, бироқ қаршилик кўрсатиш орқали қочиб қолганини билдирган.
Тезкор тадбир давомида 2003 ва 1998 йилларда Тошкент шаҳрида туғилган икки нафар шахс ушланган. Уларнинг аввал Жиноят кодексининг 169-моддаси (ўғирлик) билан судлангани маълум бўлган. Автомобиль кўздан кечирилганда, унинг юкхонасидан бир дона ўткир тиғли болта аниқланиб, процессуал тартибда расмийлаштириб олинган.
Суриштирув жараёнида гумонланувчилар ўзларига қўйилган айбловларни тан олган. Уларнинг телефонлари текширилганда, Telegram мессенжерида номаълум буюртмачи билан ёзишмалари аниқланган.
Маълум бўлишича, уларга мурожаат қилган фуқарони ҳар қандай йўл билан бўлса ҳам буюртмачи ҳузурига олиб бориш топширилган. Шунингдек, яна бир фуқарони ҳам мажбуран олиб келиш, зарур бўлса, бўйин қисмига электрошокер билан уриб ухлатиш орқали бўлса-да етказиш ҳақида кўрсатма берилган.
Иккинчи фуқарони олиб кетиш учун гумонланувчилар унинг ишхонаси олдида қарийб тўрт соат кутишган. Бироқ унинг хизмат сафарига кетганини билгач, режани бошқа кунга қолдиришган.
Мазкур ҳолат юзасидан ушланган шахсларга нисбатан Жиноят кодексининг 137-моддаси 2-қисми «б» ва «в» бандлари билан жиноят иши қўзғатилган.
Изоҳ