Бразилияда 20 ёшгача бўлган футболчилар ўртасидаги ўйинда оммавий жанжал юз берди. Натижада ҳакам Фернандо Патрик Дрошгич Модесто 53 нафарга қизил карточка кўрсатди. Бу футбол тарихидаги рекорд кўрсаткич сифатида қайд этилмоқда.
Ҳодиса 1 ноябрь куни Минас-Жерайс штати чемпионатининг иккинчи дивизионидаги ярим финал баҳсида содир бўлган. «Уберландия» ўз майдонида «Маморе»га 1:3 ҳисобида мағлуб бўлган.
Учрашувнинг қўшимча дақиқаларида меҳмонлар жамоаси учинчи голни урганидан кейин майдонда жанжал бошланган. Голни нишонлаган «Маморе» футболчисининг рақиблар захира ўриндиғи томон қилган ишоралари ва ҳақоратли сўзлари вазиятни кескинлаштирган. Шундан сўнг футболчилар ва мураббийлар ўртасида муштлашув юзага келган.
Ҳакам ҳисоботига кўра, қизил карточка олганлар орасида 43 нафар футболчи, саккиз нафар мураббийлар штаби аъзоси ва икки нафар клуб расмийси бор. Жанжал пайтида майдонда муштлашиш, тепиш ва турли буюмларни отиш ҳолатлари кузатилган.
Учрашув давомидаги тартибсизликлар сабаб ҳакам ўйинни одатий тартибда якунлай олмаган. Шунингдек, ҳакамга нисбатан таҳдидлар бўлгани ҳақида хабар берилган ва у бу юзасидан полицияга мурожаат қилган.
Бунга қадар бир футбол учрашувида энг кўп қизил карточка кўрсатиш рекорди 2011 йилда Аргентинада қайд этилган эди. Ўшанда «Атлетико Клейполе» ва «Викториано Аренас» жамоалари ўртасидаги баҳсда 36 нафар футболчи майдондан четлатилган.
Изоҳ