30 октябрь куни Анқарада бўлиб ўтган Туркий давлатлар ташкилоти Давлат раҳбарлари кенгаши йиғилишида Шавкат Мирзиёев туркий давлатлар ўртасида ID-карта орқали сафар қилиш имкониятларини кенгайтиришни таклиф қилди.
«Фуқароларимизнинг ўзаро сафарларини енгиллаштириш мақсадида мамлакатларимиз ўртасида фуқароларнинг сафарлари тўғрисида кўп томонлама келишув ишлаб чиқишни таклиф этамиз. Унда ID-карталар асосида сафар қилиш имкониятларини кенгайтириш, чегарадан ўтиш ва қабул қилувчи давлат ҳудудида бўлиш тартибини соддалаштириш масалалари акс этиши лозим», — деди президент.
Шунингдек, Шавкат Мирзиёев туркий давлатларнинг улкан туристик салоҳиятидан самарали фойдаланиш мақсадида Туркий туристик альянсини ташкил этиш ташаббусини илгари сурди.
«Фақат 2025 йилнинг ўзида мамлакатларимизга 100 миллиондан ортиқ хорижий сайёҳ ташриф буюрди. Энди туркий халқларнинг тарихий шаҳарлари, бетакрор табиати, бой маданияти ва меҳмондўстлик анъаналарини бутун дунёга биргаликда танитиш учун Туркий туристик альянсини ташкил этиш вақти келди», — деди давлат раҳбари.
Изоҳ