Президент соҳа бошқарувини такомиллаштириш ва замонавий киноиндустрияни ривожлантиришга қаратилган янги тизимга ўтилади. Бу ҳақда Шавкат Мирзиёев «Ренессанс» кино уйига ташриф буюриб, кинематография соҳаси ходимлари билан учрашувда маълум қилди.
Янги тизим доирасида Кинематография агентлиги тугатилиб, кино соҳасида давлат сиёсатини юритиш ваколати Маданият вазирлигига ўтказилади. Вазирликда Кино санъати департаменти ташкил этилади, унинг раҳбари мақоми вазир ўринбосарига тенглаштирилади.
Шунингдек, «Ўзбекфильм»нинг ташкилий ва иқтисодий модели янгиланади. Давлат муассасаси тугатилиб, замонавий бизнес модели асосида ишлайдиган янги «Ўзбекфильм» миллий кинокомпанияси ташкил этилади.
Янги кинокомпания фильмлар ишлаб чиқариш билан шуғулланмайди. Бу жараён тўлиқ хусусий секторга ўтади. Компания эса лойиҳаларни танлаш ва молиялаштириш, фильмларни тарғиб қилиш ва тарқатиш, шунингдек, уларни халқаро бозорлар ҳамда фестивалларга олиб чиқиш билан шуғулланади.
Президент миллий кинокомпания миллий кино брендини яратиш ва замонавий киноиндустрияни ривожлантириш бўйича таянч марказ ҳамда бош оператор бўлишини таъкидлади.
Масъулларга Кино санъати департаменти фаолиятини самарали йўлга қўйиш ва Кинематография агентлиги ҳамда унинг тизимидаги ташкилотларни тугатиш учун бир ой, янги миллий кинокомпания фаолиятини йўлга қўйиш учун эса бир ҳафта муддат берилди.
Изоҳ