Наманган вилояти судлари маълумотига кўра, Одилхон Исмоиловга оид жиноят иши Наманган вилояти судининг апелляция инстанциясида кўриб чиқилди. Бугун, 12 октябрь куни апелляция судининг ажрими эълон қилинди.
Суд иш доирасида етказилган зарарнинг бир қисми нақд пул шаклида депозит ҳисобварағига топширилгани, шунингдек, судланган шахсга тегишли мол-мулкни банк талабига асосан банк балансига қабул қилиш белгилангани ва хатланган мол-мулкларни сотиш орқали зарарни қоплаш чоралари кўрилганини инобатга олди.
Шунингдек, моддий зарарни қоплаш учун фақат Одилхон Исмоилов ва унинг яқин қариндошларига тегишли мол-мулк йўналтирилгани ҳам эътиборга олинди.
Натижада унга Жиноят кодексининг 167-моддаси 3-қисми «а» банди билан тайинланган жазо ўзгаришсиз қолдирилди. Бироқ Жиноят кодексининг 72-моддасига асосан жазо 3 йиллик синов муддати билан шартли деб белгиланди.
Шу тариқа, Одилхон Исмоилов суд залида қамоқдан озод қилинди.
Изоҳ