Марказий банк маълумотларига кўра, 2026 йил 1 октябрь ҳолатига Ўзбекистоннинг расмий захира активлари 66,59 млрд долларни ташкил этган. Август ойи якунида эса бу кўрсаткич 72,14 млрд доллар бўлган. Шу тариқа, сентябрь давомида захиралар 7,7 фоизга қисқарган.
Захиралар қийматининг пасайиши асосан олтин нархининг тушиши билан боғлиқ. Сентябрь ойида бир трой унция олтин нархи 4 602 доллардан 4 188,8 долларгача пасайган. Натижада олтин захираларининг доллардаги қиймати 60,09 млрд долларни ташкил этган.
Шу билан бирга, мамлакат олтин захираларининг жисмоний ҳажми 14,11 млн трой унциядан 14,34 млн трой унцияга ошган. Бу бир ойда қарийб 236 минг трой унция ёки 7,3 тонна олтин қўшилганини англатади.
Жаҳон олтин кенгаши маълумотларига кўра, август ойида ҳам Ўзбекистон Марказий банки 8 тонна олтин харид қилган. 2026 йил бошидан август ойи охиригача мамлакатнинг олтин хариди қарийб 50 тоннага етган. Бу кўрсаткич бўйича Ўзбекистон август ойида дунёдаги энг фаол олтин харидорлари қаторида бўлган.
1 октябрь ҳолатига олтин Ўзбекистоннинг умумий расмий захираларининг 90,23 фоизини ташкил этган. Хорижий валютадаги захира активлари эса 5,93 млрд долларга тенг бўлган.
Изоҳ