Трамп 19 август куни ижтимоий тармоқдаги саҳифасида Эронга келишув тузиш учун «ҳеч ким унга бунчалик катта имконият бермаганини», аммо Теҳрон бу имкониятдан фойдаланмаганини айтди.
«Шунинг учун бугун ҳар қандай давлатга қарши қўлланган энг кучли иқтисодий операцияни эълон қиляпман. Бу мисли кўрилмаган кўламдаги иқтисодий уруш ва изоляция бўлади», — деб ёзди АҚШ президенти.
Унинг таъкидлашича, Эроннинг ҳарбий-денгиз ва ҳаво кучлари жиддий зарар кўрган, ҳарбий корхоналари вайрон қилинган, миллий валютаси қадрсизланган ва мамлакат «ипга осилиб турибди».
Трамп, шунингдек, Эронга ҳар қандай ёрдам кўрсатадиган давлатларга ҳам кескин иқтисодий оқибатлар билан таҳдид қилди. Унинг айтишича, Эронга нефть контрабандаси, валюта операциялари, нақд пул ўтказмалари, айирбошлаш шохобчалари, кемалар реестри ва воситачи компаниялар орқали ёрдам бериш тўхтатилиши керак.
«Бу иқтисодий D-Day бўлади. Биз барча иттифоқчиларимиз АҚШ билан бирга Эронни изоляция қилиш ва Эрон таҳдидини енгишини хоҳлаймиз», — деди Трамп.
АҚШ президенти Эрон ҳеч қачон ядровий қуролга эга бўлмаслигини ҳам таъкидлади.
Трампнинг баёноти Эронга нисбатан иқтисодий босимни янада кучайтириш ва унинг ташқи иқтисодий алоқаларини чеклашга қаратилган янги чоралар эълон қилиниши мумкинлигини кўрсатмоқда.
Изоҳ