Ўзбекистон тумани жиноят ишлари бўйича судининг қарори билан Наманган шаҳрининг собиқ ҳокими А.О. ва бошқа шахслар ЖКнинг қуйидаги моддаларида назарда тутилган жиноятларни содир этганликда айбдор деб топилди:
— 167-модда 3-қисми "а" банди (ўзлаштириш ёки растрата йўли билан талон-торож қилиш);
— 168-модда 3-қисми "в" банди (фирибгарлик);
— 205-модда 2-қисми "а" банди (ҳокимият ёки мансаб ваколатларини суиистеъмол қилиш);
— 206-модда 2-қисми "а" банди (ҳокимият ёки мансаб ваколатларидан четга чиқиш);
— 207-модда 1-қисми (мансабга совуққонлик билан қараш);
— 209-модда 2-қисми "а" банди (мансаб сохтакорлиги);
— 210-модда 3-қисми "а" банди (пора олиш).
А.О. га 11 йил муддатга озодликдан маҳрум қилиш жазоси тайинланди. Шунингдек, у уч йил муддат давомида моддий жавобгарлик билан боғлиқ лавозимларда ишлаш ва фаолият юритиш ҳуқуқидан маҳрум қилинди.
Яна уч нафар судланувчига 7 йилдан 10 йилгача муддатга озодликдан маҳрум қилиш жазоси тайинланди. Икки нафар судланувчи 2 йил 6 ой муддатга ахлоқ тузатиш ишларига, яна бир судланувчи эса 3 йил муддатга озодликни чеклаш жазосига ҳукм қилинди.
Эслатиб ўтамиз, ўтган йил сентябрь ойида Наманган шаҳри ҳокими $60 минг пора олаётган вақтида қўлга олинган эди. У ушбу пул эвазига тадбиркорга эски турар жойлар ўрнида янги кўп қаватли уй-жой қуриш ҳуқуқини беришни ваъда қилган.
Жорий йил апрель ойида шаҳар маъмуриятининг собиқ раҳбари устидан суд жараёни бошланган эди.
Изоҳ