Ўзбекистон олий таълим, фан ва инновациялар вазири Қўнғиротбой Шарипов ва Япониянинг Сукуба университети президенти Кёсуке Нагата Ўзбекистон-Япония қўшма университетини ташкил этиш бўйича ҳамкорлик шартномасини имзоладилар. Бу ҳақда Олий таълим, фан ва инновациялар вазирлиги матбуот хизмати хабар берди.
Янги олий таълим муассасаси замонавий техник ва бошқарув компетенцияларига эга бўлган юқори малакали мутахассисларни тайёрлайди, Ўзбекистон ва Япония ўртасидаги таълим, фан ва маданий ҳамкорликни мустаҳкамлашга, шунингдек, мамлакат олий таълим тизимининг халқаро академик ҳамжамиятга янада интегратсиялашувига хизмат қилади.
Университет таъсисчилари Ўзбекистон Олий таълим, фан ва инновациялар вазирлиги ҳамда Япония университетлари консорциуми бўлиб, унинг фаолиятини Сукуба университети мувофиқлаштиради. Тсукуба университетининг ўзи ҳам академик ва таълим жараёнларини, шунингдек, консорциум ишини мувофиқлаштириш учун масъул бўлади.
Биринчи босқичда университетда "Сунъий интеллект ва рақамли трансформация" ва "Бизнес бошқаруви" йўналишлари бўйича магистратура дастурларини очиш режалаштирилган. Келгусида докторантура ва бакалавриат дастурларини очиш кўзда тутилган.
Таълим Япония олий таълим тизими модели бўйича инглиз тилида олиб борилади. Бундан ташқари, талабалар учун Японияда қисқа муддатли таълим дастурлари, шунингдек, япон тили ва маданияти курслари ташкил этилади.
Келишувга кўра, Ўзбекистон томони университет кампуси, замонавий ўқув ва илмий инфратузилмани яратиш, шунингдек, профессор-ўқитувчилар ва маъмурий ходимлар фаолиятини молиялаштиришни таъминлайди.
Тсукуба университети, ўз навбатида, ўқув дастурларини ишлаб чиқиш, Япония университетлари консорциуми фаолиятини мувофиқлаштириш, ўқитувчиларни жалб қилиш ва академик алмашинув дастурларини ташкил этишда кўмаклашади.
Режага кўра, 2026 йил сентябрь ойида Тошкентда университетнинг тайёргарлик офиси иш бошлайди. Магистратура дастурларига биринчи қабул 2028/2029 ўқув йилида ўтказилиши режалаштирилган.
Лойиҳанинг амалга оширилиши Ўзбекистон ва Япониянинг олий таълим соҳасидаги стратегик ҳамкорлигини янги босқичга олиб чиқиши ва халқаро стандартларга мос келадиган кадрлар тайёрлаш тизимини ривожлантиришга хизмат қилиши кутилмоқда.
Изоҳ