Каннаваронинг таъкидлашича, жаҳон чемпионатида мураббий сифатида иштирок этиш футболчилик давридагидан анча фарқ қилади.
“Футболчи сифатида турнирдан кўпроқ завқ оласиз. Мураббий сифатида эса доимий равишда жамоа ҳақида ўйлайсиз, турли масалаларни назорат қилишга ҳаракат қиласиз. Майдон ташқарисида турганингиз учун футболчиларга ёрдам беришни истайсиз, аммо ҳамма нарсани ўзгартириш қўлингиздан келмайди. Шунинг учун мураббий кўпроқ босим ва ташвишни ҳис қилади,” — деди у.
Бош мураббий Колумбияга қарши баҳсни таҳлил қилар экан, жамоа яхши ўйин намойиш этганини, аммо юқори савиядаги учрашувларда ҳар бир хато жазосиз қолмаслигини таъкидлади.
Унинг сўзларига кўра, биринчи гол олдидан юзага келган вазиятлар машғулотларда бир неча бор ишланган бўлса-да, футболчилар хатога йўл қўйган. Иккинчи гол эса авт ташлашдан кейинги вазиятда ўтказиб юборилган.
“Бу даражада бир лаҳза эътиборни йўқотиш ёки рақибни назоратсиз қолдиришнинг ўзи етарли. Шундай пайтда рақиб сизни жазолайди. Шунинг учун хатолар сонини имкон қадар камайтиришимиз керак,” — деди Каннаваро.
Шу билан бирга, мураббий иккинчи бўлимдаги ўйиндан мамнун эканини яширмади. Унинг фикрича, айнан шу вақтда Ўзбекистон терма жамоаси ўз имкониятларини намойиш этган.
“Мен футболчиларга доим тўп бизда бўлганда қўрқмасдан ўйнаш, ўз кучига ишониш ва футболдан завқ олиш кераклигини айтаман. Иккинчи бўлимда жамоа айнан шундай ҳаракат қилди. Биз гол урдик ва яна бир нечта яхши имкониятларга эга бўлдик,” — деди у.
Португалия ҳақида сўз юритар экан, Каннаваро рақиб таркибида жаҳон даражасидаги футболчилар жамланганини таъкидлади. Хусусан, у Криштиану Роналдуни сўнгги йигирма йилнинг энг буюк футболчиларидан бири сифатида баҳолади.
Бироқ италиялик мутахассис ўйин бошланганидан кейин номлар ва мақомлар аҳамиятсиз бўлиб қолишини таъкидлади.
“Роналду буюк футболчи ва катта юлдуз. Аммо ҳакам старт ҳуштагини чалганидан кейин буларнинг барчасини унутиш лозим. Майдонда сиз фақат ўз вазифангиз ва жамоангиз манфаати ҳақида ўйлайсиз,” — деди Каннаваро.
Мураббийнинг таъкидлашича, Ўзбекистон Португалиянинг кучли жиҳатларини чеклаш ва уларнинг заиф нуқталаридан фойдаланишга ҳаракат қилади. Бунинг учун жамоа ҳимояда юқори интизом намойиш этиши лозим.
Сўзининг якунида Каннаваро мундиалдан қандай хотира қолдиришни исташи ҳақида ҳам фикр билдирди.
“Мен одамлар Ўзбекистонни жаҳон чемпионатида илк бор иштирок этаётган, аммо ҳеч кимдан қўрқмайдиган жамоа сифатида эслаб қолишларини истайман. Биз яхши футбол ўйнайдиган, яхши ташкил этилган ва интизомли жамоа сифатида танилишимиз керак,” — деди Ўзбекистон миллий терма жамоаси бош мураббийи.
Изоҳ