Raiffeisen Bank International AG (RBI) Ўзбекистон Марказий банкида миллий ва хорижий валютада вакиллик ҳисобварақларини очди, деб хабар берди Марказий банк Матбуот хизмати.
"Бу Ўзбекистон молия бозорини ривожлантириш ва унинг халқаро молия тизимига интегратсиялашуви йўлидаги навбатдаги муҳим қадамдир," - дейилади Марказий банк хабарида.
Марказий банкнинг таъкидлашича, бу орқали хорижий инвесторларнинг давлат қимматли қоғозлари иккиламчи бозорида фаол иштирок этиши таъминланади.
Бундан ташқари, иккиламчи бозорда савдо ҳажмининг ошиши ҳисобига асосий муддатлар бўйича даромадлилик эгри чизиғи бозор тамойиллари асосида шаклланади.
Шунингдек, хорижий капитал оқими ҳисобига иқтисодиётда узоқ муддатли молиявий ресурслар кенгаяди ва пул-кредит сиёсати трансмиссиясининг самарадорлиги ошади.
Маълумот ўрнида, Raiffeisen Bank International — Австриянинг энг йирик банк гуруҳларидан бири, кооператив банк. Бош қароргоҳи Венада жойлашган. Австриядан ташқари, у Марказий ва Шарқий Европанинг яна 14 та давлатида фаолият юритиб, 17,2 миллион мижозга хизмат кўрсатади.
Изоҳ