Бош давлат ветеринария инспекторининг қарори билан 29 январдан бошлаб яқинда ўлимга олиб келувчи Нипаҳ вируси аниқланган Ҳиндистондан ҳайвонот маҳсулотларини олиб киришга вақтинчалик чекловлар жорий этилди.
Қайд этилишича, Жаҳон ҳайвонлар соғлиғини сақлаш ташкилоти маълумотларига кўра, Ҳиндистоннинг Ғарбий Бенгалия штатида вирус тарқалиши сабабли ноқулай эпидемиологик вазият кузатилмоқда.
Ҳужжат билан қуйидагиларга чекловлар киритилмоқда:
- бутун Ҳиндистон ҳудудидан тирик ҳайвонлар ва паррандаларни импорт қилиш;
- Ғарбий Бенгалия штатидан давлат ветеринария назорати остидаги барча турдаги товарларни импорт қилиш (халқаро транзит бундан мустасно).
Белгиланишича, зарур ҳолларда, эпизоотик жиҳатдан хавфсиз ҳудудлардан маҳсулотларни олиб кириш масалалари давлат ветеринария хизмати томонидан якка тартибда кўриб чиқилади.
Эслатиб ўтамиз, аввалроқ Ўзбекистон Санитария-эпидемиология қўмитаси фуқароларни Ҳиндистон ва Жануби-Шарқий Осиё мамлакатларида Нипаҳ вируси тарқалиши шароитида эҳтиёт чораларини кўриш зарурлиги ҳақида огоҳлантирган эди. Шунга қарамай, мутахассислар ушбу касалликнинг Ўзбекистонга кириб келиш эҳтимоли жуда пастлигини таъкидлади.
Изоҳ