Администрация ва давлат органларида комплаенс ва коррупцияга қарши ички назорат тизими жорий этилди.
Бюджет тушумлари, талон-торожликлар ва молиявий қонунбузилишлар бўйича 53 трлн сўмлик, ташқи савдо операциялари бўйича эса 8 млрд доллардан ортиқ қарздорлик аниқланган.
Коррупсион схемалар бўйича 4,2 трлн сўмлик зарар аниқланган, шундан 1,3 трлн сўми аллақачон ундирилган, 55 киши қамоққа олинган.
Хусусан, Ички ишлар вазирлиги тизимида давлат харидлари чоғида 186 млрд сўмлик бюджет маблағлари талон-торож қилингани аниқланиб, вазирнинг собиқ ўринбосари Б. Абдуллаев ва Жазони ижро этиш департаменти собиқ бошлиғи Р. Турсуновга нисбатан жиноят иши қўзғатилган.
Эслатиб ўтамиз, ўтган йилнинг ноябрь ойида президент Б.Абдуллаев ва Р.Турсуновни эгаллаб турган лавозимларидан озод этиш тўғрисидаги қарорни имзолаган эди.
"Билиб қўйинглар: давлатнинг ҳар бир сўми бўйича қатъий назорат ўрнатилади. Жавобгарлик муқаррар, жазо оғир бўлади," - деди президент.
Шавкат Мирзиёев давлат органлари ва корхоналарда хавфсизлик учун масъуллар фаолиятини танқидий кўриб чиқиш вақти келганини таъкидлади.
"Бизга юксак профессионал билим ва талабчан раҳбар кадрлар керак," - деди президент.
Шунингдек, ҳуқуқни муҳофаза қилиш тизимида хизмат қилишнинг белгиланган ёш чегарасига (полковниклар учун - 55 ёш, генераллар учун - 60 ёш) қарамай, бугунги кунда ушбу ёшдан ошган 300 дан ортиқ ходимлар раҳбарлик лавозимларида ишлашда давом этаётгани кўрсатиб ўтилди. Шу билан бирга, Фавқулодда вазиятлар вазирлиги тизимида 50 ёшгача бўлган барча раҳбар кадрлар бор.
Раҳбарлик лавозимларига ёш кадрларни тайинлаш, шунингдек, пенсия ёшидаги ходимларнинг мураббий ва ўқитувчи сифатидаги тажрибасидан фойдаланиш ёки уларнинг жойларда ёшлар тарбиясида иштирок этиш тизимини яратиш муҳимлиги таъкидланди.
Изоҳ