Ўзбек спортида сўнгги йилларда эришилаётган ютуқлар, соҳада амалга оширилаётган ислоҳотлар нафақат жаҳон ҳамжамияти, балки оммавий ахборот воситаларининг ҳам эътиборини тортмоқда.
Европа нашрларида Ўзбекистон жаҳон спорт мамлакатига айланиш йўлида тарихий бурилиш нуқтасига эришгани ҳақида мақолалар чоп этилди. Шунингдек, 2026 йил 26 январь куни Осиё Олимпия Кенгаши (ООК) Бош ассамблеясини қабул қилишга тайёргарлик кўраётгани ва бунгача мисли кўрилмаган спорт ютуқлари ва инфратузилмани тизимли ривожлантириш даври бўлгани таъкидланди.
Жумладан Insidethegames.biz, sports-insight.co.uk ва Европанинг бошқа кўплаб таниқли нашрлари Ўзбекистон спорти учун ғоят сермаҳсул ўтган 2025 йил якунлари, шунингдек, президентнинг соҳани қўллаб-қувватлаб келаётгани ҳақида таҳлилий мақолалар чоп этмоқда.
"Президент Шавкат Мирзиёевнинг стратегик қарашлари туфайли 2025 йилга келиб Ўзбекистон спорт соҳасида янги марраларни забт этди. Шу билан бирга, мамлакат йирик халқаро спорт тадбирларини ўтказиш бўйича етакчи марказ сифатида ўз обрўсини мустаҳкамлади. Кузатувчиларнинг таъкидлашича, бу юксалиш тобора кўпроқ стратегик режалаштириш намунаси сифатида кўрилмоқда. Бу ерда халқаро спорт дипломатияси ва ички сиёсат уйғунлашган," - деб ёзди Буюк Британиянинг нуфузли sports-insight.co.uk нашри.
Испаниянинг машҳур sportsin.biz эса ўзбек футболи тарихида янги саҳифа очилганини эътироф этди.
Ўзбекистоннинг тараққиёти элита даражасидаги ютуқларда яққол намоён бўлмоқда. CAFA Миллатлар Кубогидаги ғалабадан сўнг миллий футбол жамоасининг ФИФА Жаҳон чемпионатига тарихан биринчи марта йўлланма олиши мамлакатни халқаро миқёсда қабул қилишда бурилиш нуқтаси бўлди. Бу ютуқ тузилмавий ривожланишга содиқликни ифодаловчи ва ФИФА президенти Жанни Инфантино томонидан эътироф этилган янги Миллий футбол марказининг ташкил этилиши билан янада мустаҳкамланди.
Инфратузилма, миллий фалсафа ва глобал истиқболлар
Ўтган йил давомида қуриб битказилган инфратузилма лойиҳалари орасида Олимпия шаҳарчаси hostcity.com нашрида алоҳида эътироф этилди.
12 000 ўринли стадион, велотрек, сув спорти маркази, жамоавий спорт ва жанг санъати майдонларини ўз ичига олган мажмуа Осиё Олимпия қўмитаси томонидан 2029 йилги ёшлар ўртасидаги Осиё ўйинларининг асосий маркази ва Президент олимпиадаси ўтказиладиган жой сифатида танлангани таъкидланди.
"Бу ривожланиш халқаро қизиқишнинг ортиб бориши билан бирга давом этмоқда, бу жаҳон федерациялари раҳбарларининг ташрифларида ва 2026-йилги тақвимда, жумладан, триатлон, шахмат ва сузиш бўйича жаҳон миқёсидаги мусобақаларда ўз аксини топмоқда, бу эса Ўзбекистоннинг глобал спорт экотизимидаги ўрнини мустаҳкамламоқда," - дейилади нашр хабарида.
Изоҳ