Тошкентнинг Олмазор туманидаги Қорақамиш массивида жойлашган хусусий клиникага бурнини операция қилдириш учун мурожаат қилган 31 ёшли эркак вафот этди, дейилади "Миллар" дастури репортажида.
Оила аъзоларининг сўзларига кўра, эркак тахминан 11:30 ларда операция хонасига олиб борилган ва кейинчалик маълум бўлишича, у худди шу вақтда вафот этган. Яқинларининг таъкидлашича, уларга бу ҳақда бир неча соатдан кейин хабар беришган ва буни операция бошланишидан олдин беморнинг юраги тўсатдан тўхтаб қолгани билан изоҳлашган. Оиланинг тахминича, бунга наркознинг ҳаддан ташқари кўп берилиши сабаб бўлган бўлиши мумкин.
Марҳумнинг турмуш ўртоғи ҳам текширув натижаларини кардиологга Telegram орқали юборганини ва беморнинг юраги жойида экани ҳамда унга қарши кўрсатма йўқлиги ҳақида тасдиқнома олганини бироқ, кейинчалик ёзишмалар ўчириб ташланганини айтди.
Дастлабки тиббий хулосага кўра, беморда анафилактик шок ва номаълум сабабга кўра юрак тўхташи қайд этилган. Суд-тиббий экспертизасининг якуний қарори ҳали тайёр эмас.
Ҳозирда ҳолат юзасидан Олмазор тумани прокуратураси томонидан терговга қадар текширув ҳаракатлари олиб борилмоқда. Қариндошларининг сўзларига кўра, клиника ҳали ҳам ишлашда давом этмоқда.
Изоҳ