Электр энергияси, нефть маҳсулотлари ва газдан фойдаланишни назорат қилиш инспекцияси "Ёқилғи қуйиш шохобчаларида аварияларнинг олдини олиш ва одамлар ҳаётига хавф туғдирувчи омилларни бартараф этиш чора-тадбирлари тўғрисида"ги қонун лойиҳасини жамоатчилик муҳокамасига қўйди.
Ҳужжатга кўра, Қурилиш ва уй-жой коммунал хўжалиги вазирлиги ҳамда ҳокимликларга 2026 йил 1 апрелга қадар фуқароларнинг ҳаёти ва соғлиғига таҳдид соладиган, шаҳарсозлик нормалари, ёнғин ва саноат хавфсизлигини бузадиган барча ёқилғи қуйиш шохобчаларини хавфсиз ҳудудларга кўчириш топширилди.
Бундан ташқари, 2026 йил 1 январдан бошлаб беш йилдан ортиқ ишлатилган ёки ишлаб чиқарилган муддати белгиланмаган босим остидаги резервуарларни олиб кириш ва улардан фойдаланиш, шунингдек, хизмат муддати тугаган ускуналардан саноат хавфсизлиги экспертизасини ўтказмасдан фойдаланиш тақиқланади.
Бир вақтнинг ўзида бензин, дизель ёқилғиси ва суюлтирилган газни сақлаш резервуарлари, шунингдек тарқатиш колонкалари жойлаштириладиган контейнерларни ўрнатиш ва улардан фойдаланиш тақиқланади.
Аварияларнинг олдини олиш ва фуқаролар ҳаётини муҳофаза қилиш учун "Ўзенергоинспексия" ва Саноат, радиация ва ядро хавфсизлиги қўмитаси бир йилда камида бир марта ёнғин ва саноат хавфсизлиги талабларига риоя этилишини текширишлари шарт.
Шунингдек, авария ва бахтсиз ҳодисаларнинг олдини олиш мақсадида ҳар йили ходимларнинг билимини текшириш ва малакасини ошириш талаби киритилмоқда.
Қонун лойиҳаси билан ёқилғи қуйиш шохобчаларида ёнғин хавфсизлиги, технологик назорат ва жиҳозлаш, суюлтирилган углеводород газини реализация қилишда саноат хавфсизлиги ва атроф-муҳитни муҳофаза қилиш бўйича минимал талаблар таклиф этилмоқда.
"Қарор лойиҳасининг ишлаб чиқилиши Қашқадарё вилоятининг Кўкдала туманидаги "Олтиндала" маҳалласида газ қуйиш шохобчасида ёқилғи резервуарларининг портлаши натижасида ёнғин содир бўлган каби бахтсиз ҳодисалар, шунингдек, сўнгги пайтларда мамлакатнинг турли ҳудудларида тез-тез учраётган шунга ўхшаш ҳолатларнинг олдини олиш зарурати билан боғлиқ," - дейилади инспекция тушунтириш хатида.
Ҳужжатда лицензияловчи ва рухсат берувчи органларнинг масъулияти ва жавобгарлигини кучайтириш, фуқароларнинг ҳаёти ва соғлиғини ҳимоя қилиш, жамоат хавфсизлиги ва атроф-муҳитни муҳофаза қилиш устуворлигини таъминлаш, шунингдек, тегишли тартиб-таомилларни қонун ҳужжатларига мувофиқлаштириш назарда тутилган.
Изоҳ