АҚШнинг Висконсин штатида яшовчи 45 ёшли эркак ўзини ҳалок бўлгандай кўрсатиб, Ўзбекистонлик аёл ёнига қочиб кетиш учун ҳийла ишлатгани учун қамоққа ҳукм қилинди, деб ёзади CNN.
2024 йил 12 август куни у хотинига Грин-Лейк кўлида каякда сайр қилишини айтганидан сўнг бедарак йўқолган. Дастлаб бу ҳолат сузиш пайтида ғарқ бўлиш эҳтимоли сифатида тергов қилинган. Бироқ 58 кунлик натижасиз қидирувдан сўнг иш доираси кенгайтирилди.
Янги далиллар, жумладан, бедарак йўқолишидан уч ой олдин янги паспорт олгани, терговчиларда унинг ўлимини инсценировка қилгани ва Ўзбекистонлик аёл билан учрашиш учун кетгани ҳақида гумон уйғотган.
Тергов материалларига кўра, 11 август куни у каягини ағдариб, олдиндан олиб чиққан резина қайиқда соҳилга чиққан ва ҳужжатларини кўлга ташлаб юборган. Кейин Торонто орқали Парижга, у ердан Осиёдаги бир давлатга йўл олган ва охир-оқибат Грузияга бориб чиққан. Унинг сўзларига кўра, аёл уни кутиб олган ва улар бир неча кун меҳмонхонада яшаганидан сўнг, у Грузияда жойлашиб олган.
Ноябр ойида уни топишди, декабрда эса АҚШга қайтди. У ўзини топширди ва терговга тўсқинлик қилганликда айбланди.
Судья унга 89 кун қамоқ жазоси тайинлади — бу унинг ҳуқуқ-тартибот органларини алдаган даврига тўғри келади. Шунингдек, у қидирув ишларига сарфланган 30 минг долларни тўлаб беришга мажбур қилинди.
Маълумотга кўра, уч фарзанди билан 22 йил бирга яшаган хотини тўрт ойдан сўнг ундан ажрашган.
Изоҳ