“Миллий тикланиш” партияси раиси Алишер Қодиров дунёвийлик тушунчаси ва унинг мазмунига оид фикрларини билдирди. Унинг таъкидлашича, Ўзбекистоннинг дунёвий давлат эканлиги баҳссиз ва бу фуқароларга қонунга хилоф қилмаган ҳолда эркин яшаш имконини беради.
Қодировнинг сўзларига кўра, мамлакатда барча миллат ва қарашдаги инсонлар тенг ҳуқуққа эга бўлиб, ҳеч ким ками тутилиши мумкин эмас. У мисол тариқасида пиво ичиш ёки ичмаслик — шахсий танлов эканини, бироқ алкоголь маҳсулотларини реклама қилиш қонун билан тақиқланганини қайд этди.
Сиёсатчи жамиятда турли маданий тадбирлар ўтказилишини ҳам дунёвийликнинг бир кўриниши деб баҳолади. Масалан, у Женифер Лопес концертини мисол келтириб, унинг либоси ҳам, тадбирга келиш ёки келмаслик ҳам шахсий танлов эканини таъкидлади. Шу билан бирга, Қодиров аёллар рўмол ўраб юришини ҳам қонун билан ҳимоя қилиниши лозимлигини айтди.
“Яланғоч намойишини дунёвийлик деб қабул қилдик, энди ёпиниб юриш ҳуқуқига ҳам дахл қилмаслик кераклигини қабул қилайлик. Лопесга қандай кийинишни ўргатмаганимиздек, эътиқодли аёлларимизга рўмолни қандай ўрашни ўргатишни, қолаверса, шу ёшга келиб эътиқоди талабига риоя қилган аёлларни паспортга рўмолини ечиб тушишга мажбурлашни ҳам тўхтатиш керак. Идентификация талаблари юзни очиқ бўлишини тақозо қилади, сочни эмас. Лопесга кўрсатган бағрикенглигимизни диндор аёлларимизга ҳам кўрсатайлик.”, — деди у.
Алишер Қодировнинг таъкидлашича, дунёвийлик — бу кучлининг кучсизга “дарс ўтиши” эмас, балки ҳам ишонган, ҳам ишонмаганларга тенг муносабатда бўлишдир.
Изоҳ