Aввалроқ, ижтимоий тармоқларда Жигули автомобили 6 та машинага бориб урилгани акс этган видео тарқалиб, кенг муҳокамаларга сабаб бўлган эди.
Маълум қилинишича, ушбу ҳолат жорий йилнинг 1 декабрь куни соат 13:30 атрофида Жиззах шаҳар "Шодлик" МФЙ ҳудудидан ўтган 4R36 “Жиззах- Янги қишлоқ- Қизилча” автомобиль йўлининг 2 км.ида содир бўлган.
Хабарга кўра, Жигули ҳайдовчиси автомобилни “Фориш-Жиззах” йўналиши бўйлаб бошқариб бораётиб, бошқарувни йўқотган. Натижада йўналиши бўйлаб ўнг томонда овқатланиш шохобчаси ёнида турган автомобилларга бориб урилган.
Ушбу ЙТҲ натижасида Vaz-2107 ҳайдовчиси бош мия жароҳати билан Республика шошилинч тез ёрдам илмий маркази Жиззах вилояти филиалининг жонлантириш бўлимига ётқизилган. Ушбу транспорт воситасида бўлган икки нафар йўловчига тез тиббий ёрдам кўрсатилган.
Шунингдек, 5 та автомобилга моддий зарар етказилган. Ҳозирда ҳолат юзасидан Жиззах шаҳар ИИБ тергов бўлими томонидан дастлабки суриштирув ишлари олиб борилмоқда.
