Норматив-ҳуқуқий ҳужжатлар лойиҳалари муҳокамаси порталида эълон қилинган қонун лойиҳасига кўра, митинг, йиғилиш ва намойишларни ҳафтанинг иш кунлари соат кундузи 10:00дан 18:00гача вақт оралиғида ўтказишга рухсат берилади.
Шунингдек, –
– Митинг, йиғилиш ва намойишлар давомийлиги икки соатдан ошмаслиги лозим.
– Митинг, йиғилиш ва намойишларни ўтказилишини таъминлаш мақсадида жамоат тартибини сақлаш, йўл ҳаракатини тартибга солиш, санитария ва тиббий хизмат кўрсатиш бепул асосда амалга оширилади.
– Митинг, йиғилиш ва намойишлар ташкилотчиларининг фарқловчи белгини тақиши мажбурийдир.
– Митингларда ниқоб ва улар шахсини визуал аниқлашни қийинлаштирувчи ва бошқа воситалардан фойдаланиш тақиқланади.
– Ушбу тадбирларни ўтказишга маҳаллий ҳокимиятдан рухсат олиш учун ариза намойишлар ўтишидан 15 иш кунидан кам бўлмаган муддатдан олдин тақдим этилиши лозим.
– Ариза 10 иш куни ичида кўриб чиқилади.
– Хорижий давлатлар, халқаро, хорижий нохукумат ва нотижорат ташкилотлар томонидан митинг, йиғилиш ва намойишларни молиялаштиришга рухсат берилмайди.
– Фуқароларни моддий рағбатлантириш эвазига митинг, йиғилиш ва намойишларга жалб қилиш тақиқланади.
– Бир жойда ва бир вақтнинг ўзида бир объект ёнида икки ёки ундан ортиқ митинг, йиғилиш ва намойишлар ўтказишга рухсат берилмайди.
– Мазкур Қонунда белгиланган объектлар ва ҳудудлардан 300 метргача масофада митинг, йиғилиш ва намойишлар учун, шунингдек, иштирокчиларнинг ҳаракатланиш йўналиши учун жой ажратиш тақиқланади.
Қонун лойиҳасининг муҳокамаси 2 сентябргача давом этади.
