Тошкент халқаро аэропортида божхона ходимлари томонидан мобиль қурилмаларни ноқонуний олиб киришга уриниш ҳолатлари аниқланди. Бу ҳақда Давлат божхона қўмитаси матбуот хизмати хабар берди.
Маълум қилинишича, айрим йўловчилар хориждан олиб келаётган телефонларининг IMEI-кодлари ўрнига аввал ноқонуний олиб кирилган бошқа қурилмаларга тегишли кодларни йўловчи божхона декларациясига киритган.
Бунинг учун смартфонларнинг дастурий таъминоти қайта ўрнатилиб, уларга бошқа қурилмаларнинг IMEI-кодлари бириктирилган. Натижада телефон созламаларида бир IMEI-код, USSD-сўров орқали текширилганда эса бошқа код акс этган.
Божхона ходимлари ушбу усул орқали олиб киришга уринилган сўнгги русумдаги 20 та iPhone смартфонини аниқлаган. Уларнинг умумий қиймати қарийб 310 миллион сўмни ташкил этади.
Ҳозирда мазкур ҳолатлар юзасидан божхона текширувлари давом этмоқда. Шу каби қонунбузилиш ҳолатларини аниқлаш чоралари кўрилмоқда.
Изоҳ