Ҳодиса 11 октябрь куни Ўзбекистон ҳаво йўллари самолётида содир бўлган.
Маълум қилинишича, парвоз вақтида аёл йўловчи тўсатдан оғир шок ҳолатига тушиб қолган. Видеони тақдим этган йўловчининг сўзларига кўра, ўша пайтда аёлнинг қон босими тушиб кетган.
Самолёт экипажи зудлик билан йўловчилар орасидан шифокор бор-йўқлигини сўраган. Ҳатто фавқулодда қўниш эҳтимоли ҳам кўриб чиқилган.
Айнан шу вақтда яқин ўриндиқда Жанубий Кореядаги Чунгбук университети касалхонасида амалиёт ўташ учун кетаётган ўзбекистонлик шифокор Комил Хасанов бўлган.
Оториноларинголог шифокор зудлик билан ёрдамга келиб, аёлга кислород берган, укол қилган ва биринчи тиббий ёрдам кўрсатишни бошлаган.
Кўрсатилган тезкор ёрдам натижасида аёлнинг аҳволини барқарорлаштиришга эришилган. Оқибатда самолёт фавқулодда қўнишга мажбур бўлмаган ва белгиланган йўналиш бўйича Жанубий Кореяга етиб борган.
"Бундай вазиятда энг муҳими — саросимага тушмаслик, хотиржамликни сақлаш ва ҳаракат қилиш. Шифокорлик — бу касб, инсон ҳаёти эса бебаҳо", — деган Комил Хасанов.
Изоҳ