20–22 сентябрь кунлари «Тошкент халқаро аэропорти» чегара божхона пости ходимлари томонидан ўтказилган назорат тадбирларида йўловчилардан 8 дона iPhone 18 ва 6 дона iPhone 17 русумидаги смартфонлар аниқланган. Уларнинг умумий қиймати 227 млн сўмга баҳоланган, дея хабар қилмоқда Божхона қўмитаси матбуот хизмати.
Маълум қилинишича, мазкур телефонлар божхона ходимларининг оғзаки сўрови ҳамда йўловчи божхона декларациясида кўрсатилмаган.
Амалдаги тартибга кўра, жисмоний шахслар шахсий эҳтиёжлари учун хориждан 2 донагача мобил қурилма олиб кириши мумкин. Агар телефонларнинг қиймати божсиз олиб кириш меъёридан ошса, ошган қисмига 30 фоиз миқдорида ягона божхона тўлови ундирилади.
Шунингдек, хориждан олиб кирилаётган мобил қурилмалар йўловчи божхона декларациясида кўрсатилиши шарт. Декларация кейинчалик телефонни UzIMEI тизимида рўйхатдан ўтказиш учун асос бўлиб хизмат қилади.
Божхона органларининг таъкидлашича, телефонни декларация қилмасдан олиб кириш ҳолатида кейинчалик UzIMEI тизимида рўйхатдан ўтказиш жараёнида қурилманинг тўлиқ қийматидан 30 фоиз миқдорида тўлов ундирилади. Декларация қилинган телефонларда эса божсиз олиб кириш меъёридан ошган қисми учун тўлов амалга оширилади.
Расмий маълумотларга кўра, «Тошкент-АЭРО» ихтисослаштирилган божхона комплекси томонидан йил бошидан буён қиймати 7,8 млрд сўмлик 162 дона мобил қурилманинг ноқонуний олиб кирилишига чек қўйилган.
Ҳозирда аниқланган ҳолатлар юзасидан божхона текширувлари давом эттирилмоқда.
Изоҳ