Президент «Аҳолини шовқиннинг зарарли таъсиридан ҳимоя қилиш тўғрисида»ги қонунни имзолади, у 11 декабрдан кучга киради. Ҳужжат дам олиш кунлари учун алоҳида осойишталик вақтларини белгилаб, кўп қаватли уйларда дам олиш ва байрам кунлари шовқинли таъмирлаш ишларини тақиқлайди, шунингдек, тинчликни бузганлик учун жарималарни оширади.
Ҳозирги вақтда тунги вақтда фуқароларнинг осойишталиги ва нормал дам олишини бузганлик учун жисмоний шахсларга БҲМнинг 1/3 қисми (146,7 минг сўм), мансабдор шахсларга эса 1/3 дан 1/2 БҲМгача (220 минг сўмгача) миқдорида жарима солинади.
Ҳуқуқбузарлик бир йил давомида такроран содир этилганда, жарима фуқаролар учун 1/2 БҲМни, мансабдор шахслар учун эса 1/2 дан 1 БҲМгача (440 минг сўмгача) ташкил этади.
Қонун билан Маъмурий жавобгарлик тўғрисидаги кодекснинг 192-моддаси янги таҳрирда баён этилди. Мазкур модда санкцияларида жарима миқдорларини ошириш назарда тутилган.
Жумладан, маиший шовқинга қарши курашиш талабларини бузганлик учун фуқароларга 3–5 БҲМ (1,32 млн сўмдан 2,2 млн сўмгача), мансабдор шахсларга эса 10–15 БҲМ (4,4 млн сўмдан 6,6 млн сўмгача) миқдорида жарима солинади. Шу тариқа, фуқаролар учун энг кам жарима 9 бараварга, энг юқори жарима эса 15 бараварга ошади. Мансабдор шахслар учун жарималар 30 бараварга кўпаяди.
Маъмурий жазо қўлланилганидан кейин бир йил ичида ҳуқуқбузарлик такроран содир этилса, фуқаролар учун жарима 5–7 БҲМ (3,08 млн сўмгача), мансабдор шахслар учун эса 15–20 БҲМ (8,8 млн сўмгача) бўлади.
Шу тариқа, такрорий ҳуқуқбузарлик учун фуқароларга солинадиган жарималар 10–14 бараварга, мансабдор шахслар учун эса 20–30 бараварга ошади.
Шунингдек, шовқин даражаси белгиланган меъёрлардан юқори бўлган транспорт воситаларидан фойдаланганлик учун жавобгарлик кучайтирилади. Ҳозирда ушбу ҳуқуқбузарлик МЖтКнинг 125-моддаси 2-қисмига тааллуқли бўлиб, огоҳлантириш ёки 0,5 БҲМ — 220 минг сўм миқдорида жаримага сабаб бўлади. Қонун кучга кирганидан сўнг у 125-модданинг 3-қисмига ўтказилади ва унда 1 БҲМ (440 минг сўм) миқдорида жарима назарда тутилган.
Эслатиб ўтамиз, қонунга кўра, инсонда сезиларли безовталикни келтириб чиқармайдиган, организмнинг функционал тизимлари ва шовқинга сезгир аъзоларида жиддий ўзгаришларга олиб келмайдиган шовқин даражаси рухсат этилган ҳисобланади. Йўл қўйиладиган энг юқори кўрсаткичлар санитария қоидалари ва меъёрлари билан белгиланади.
Қонун билан рухсат этилган даражадан юқори шовқин чиқариш орқали фуқароларнинг осойишталигини бузиш тақиқланади. Иш кунлари чекловлар 23:00 дан 07:00 гача, дам олиш ва ишланмайдиган байрам кунлари эса 22:00 дан 09:00 гача амал қилади.
Бундан ташқари, кўп қаватли уйларда шовқинли қурилиш ва таъмирлаш ишларини иш кунлари 09:00 дан 18:00 гача ўтказишга рухсат берилади. Дам олиш ва ишланмайдиган байрам кунлари бундай ишларни олиб бориш тақиқланади.
Изоҳ