Apple’нинг 9 сентябрь куни бўлиб ўтган тақдимотида компания янги iPhone 18 Pro ва iPhone 18 Pro Max смартфонларини намойиш қилди. Бу янги CEO Жон Тернус раҳбарлигидаги биринчи катта Apple тақдимоти бўлди.
iPhone 18 Pro сериясида 2 нанометрлик технология асосида ишлаб чиқилган янги A20 Pro процессори қўлланилган. У олдинги авлодга нисбатан ишлаш самарадорлигини 40 фоизга оширади.
Чип олти ядроли CPU ва етти ядроли GPU билан ишлайди. Қурилманинг совитиш тизими ҳам янгиланган: янги буғ камераси аввалги моделдагидан уч баравар катта майдонни қамраб олади.
Компания янги смартфонларда iPhone тарихидаги энг узоқ батарея ишлаш вақтини таъминлаганини таъкидлади.
iPhone 18 Pro бир марта қувватланишда 36 соатгача видео кўриш, iPhone 18 Pro Max эса 45 соатгача видео кўриш имконини беради. Шунингдек, 15 дақиқалик симли қувватлаш орқали iPhone 18 Pro’да 6 соатгача видео кўриш мумкин.
iPhone 18 Pro серияси камера тизимида ҳам сезиларли ўзгаришлар қилинди.
Асосий камера 48 МП сенсорга эга бўлиб, унда ўзгарувчан диафрагма технологияси қўлланилган. Бу суратга олиш вақтида объективга тушадиган ёруғлик миқдорини бошқариш ва фон хиралигини аниқроқ назорат қилиш имконини беради.
Камера учун янги Pro Controls функцияси ҳам қўшилди. У фойдаланувчига, жумладан, затвор тезлигини қўлда ўзгартириш орқали ҳаракатдаги объектлардаги хиралик даражасини бошқариш имконини беради.
Видео имкониятлари ҳам кенгайтирилди. Энди Timelapse режимида 4K ва Dolby Vision HDR форматида видео олиш мумкин.
Янги iPhone моделлари Apple’нинг сунъий интеллект технологиялари билан янада чуқурроқ интеграция қилинган. Компания Siri’нинг янги AI имкониятларига алоҳида эътибор қаратди.
Янги функциялар махфийлик ва хавфсизликни сақлаган ҳолда ишлашга қаратилган.
iPhone 18 Pro ва Pro Max ташқи кўриниши жиҳатидан олдинги авлодга яқин бўлса-да, янги ранглар қўшилди. Смартфонлар қора, кумуш, «глейшер» ва бордо рангларида тақдим этилди.
Apple шунингдек тадбирда янги iPhone сериясининг бошқа модели — компаниянинг биринчи букланадиган смартфонини ҳам намойиш қилди. Бу Apple’нинг букланадиган смартфонлар бозорига биринчи кириб келишидир.
iPhone 18 Pro’нинг бошланғич нархи 1 199 доллар, iPhone 18 Pro Max’ники эса 1 299 долларни ташкил қилади.
Изоҳ