Туркиянинг Мугла вилояти Милас туманида ўзбекистонлик 28 ёшли М.Б. ва турк фуқароси М.А.нинг тўйидан сўнг можаро юзага келди. Бу ҳақда маҳаллий нашрлар ёзмоқда.
Маълум бўлишича, жуфтлик уч куну уч кеча давом этган тўйдан кейин 5 миллион турк лираси атрофидаги тилла ва тақинчоқлар йўқолгани сабабли полицияга мурожаат қилган. Келин уйдан тилла тақинчоқлар, нақд пул ва телефонни олиб кетгани иддао қилинган.
Дастлаб турк ОАВлари келин тиллалар билан ғойиб бўлгани ҳақида хабар тарқатган. Кейин М.Б. ўз хоҳиши билан полицияга бориб, айбловларни рад этган.
У 20 дона чорак тилла ва 226 минг турк лирасини олганини тан олган, аммо қолган тиллалар қайнотаси М.Т.да эканини айтган. Келин, шунингдек, эри ва қайнотаси уни ҳамда онасини ҳақорат ва таҳдид қилганини билдириб, улар устидан шикоят қилган.
Ҳозирда тилла, пул ва телефон билан боғлиқ қарама-қарши даъволар юзасидан тергов давом этмоқда. Келиннинг уйида ўтказилган тинтув вақтида йўқолган тиллалар топилмаган.
Изоҳ