Жохеирри Мола Домингоес 5 сентябрь куни Вьетнамнинг Нячанг шаҳрида ўтказилган финалда 111 давлат вакили орасида энг юқори натижани қайд этди.
Мазкур танлов Доминикан Республикаси учун ҳам тарихий аҳамиятга эга бўлди. Жохеирри Мола мамлакат тарихида “Miss World” тожини қўлга киритган иккинчи вакил бўлди. Доминикан Республикасининг аввалги ғолиби Мариасела Альварес 1982 йилда танловда биринчи ўринни эгаллаган эди. Шу тариқа мамлакат 44 йилдан сўнг яна дунё гўзали унвонини қўлга киритди.
Мола нафақат модель, балки адабиёт ва ижтимоий фанлар ўқитувчиси, журналист ҳамда жамоат фаоли сифатида фаолият юритади. У Универсидад Ибероамериканада бизнес бошқаруви ва маъмурият йўналишида таҳсил олган. Шунингдек, у “Voices of Tomorrow” жамоат ташкилоти асосчиси бўлиб, ижтимоий ҳимояга муҳтож ҳудудлардаги болалар ва ёшларга инглиз тилини ўргатишга қаратилган лойиҳаларни амалга оширади.
Моланинг айнан ижтимоий лойиҳаси танловдаги асосий устунликларидан бири бўлган. “Miss World” ташкилоти танловнинг “Beauty With a Purpose” — “Мақсадли гўзаллик” тамойилига катта эътибор қаратади. Бу йўналишда иштирокчилар нафақат ташқи кўриниши, балки жамият учун амалга ошираётган ишлари билан ҳам баҳоланади.
Финалгача иштирокчилар бир ой давомида Вьетнамнинг турли ҳудудларида ўтказилган тадбирлар, хайрия акциялари, маданий дастурлар, интервьюлар ва турли танловларда иштирок этди. Жами 111 нафар миллий вакил иштирок этган мусобақада дастлаб 40 нафар, кейин 20 ва 12 нафарлик босқичлар шакллантирилди.
Финалнинг ҳал қилувчи босқичига эса олти нафар иштирокчи — Жанубий Африка, Доминикан Республикаси, Вьетнам, Малайзия, Испания ва бошқа минтақалар вакиллари йўл олди. Якунда асосий тож Доминикан Республикаси вакилига насиб қилди.
Испания вакили Элизабет Рейнес биринчи вице-мисс, Малайзия вакили Танусия Четти эса иккинчи вице-мисс деб топилди. Четти, шунингдек, “Beauty With a Purpose” йўналишидаги лойиҳаси билан алоҳида эътироф этилди.
Бу йилги “Miss World” танлови яна бир жиҳати билан аҳамиятли бўлди: Вьетнам илк бор мазкур нуфузли халқаро танловга мезбонлик қилди. Финал Нячанг шаҳридаги 2 апрель майдонида очиқ осмон остида ўтказилди. Танлов 1951 йилда Лондонда ташкил этилган “Miss World”нинг 75 йиллигига бағишланган тадбирлар доирасида бўлиб ўтди.
Тожни Жохеирри Молага “Miss World-2025” ғолиби, Таиланд вакили Опал Сучата Чуангсри топширди. У 2025 йилда “Miss World” тарихида Таиланддан ушбу унвонни қўлга киритган биринчи вакил бўлган эди.
Изоҳ