Жаҳон чемпионатининг биринчи ярим финалида Испания Францияни 2:0 ҳисобида мағлуб этиб, мусобақанинг биринчи финалчисига айланди. Луис де ла Фуэнте шогирдлари бутун учрашув давомида ўйинни назорат қилди ва ҳужум ҳамда ҳимояда деярли хатога йўл қўймади. Микель Оярсабаль пенальтидан ҳисобни очган бўлса, Педро Порронинг голи Испаниянинг устунлигини янада мустаҳкамлади.
Франция эса турнир давомидаги энг омадсиз ўйинини ўтказди. Килиан Мбаппе бошчилигидаги ҳужум чизиғи Испаниянинг мустаҳкам ҳимоясини ёриб ўта олмади. Натижада Франция Жаҳон чемпионати финалига чиқиш имкониятини бой берди.
Энди навбат — Англия ва Аргентинага
Иккинчи ярим финалда Англия ҳамда Аргентина ўзаро ҳисоб-китоб қилади. Бу нафақат финал йўлланмаси, балки футбол тарихидаги энг принципиал рақобатлардан бирининг янги саҳифаси ҳисобланади. Фолкленд уруши тарихи, 1986 йилги Диего Марадонанинг "Худонинг қўли" голи, 1998 йилги драматик баҳс ва кейинги йиллардаги кескин рақобат бу учрашувга алоҳида муҳит бағишлайди.
Қоғозда жамоаларнинг имкониятлари деярли тенг. Англия Томас Тухель қўл остида интизомли ва мувозанатли футбол кўрсатмоқда. Аргентина эса амалдаги жаҳон чемпион сифатида катта тажриба ва босим остида ўйнаш маҳоратига эга.
Финалда қандай тарихий тўқнашув бўлиши мумкин?
Агар Аргентина ғалаба қозонса, финалда Испанияга қарши ҳақиқий тарихий қарама-қаршилик юзага келади.
Амалдаги жаҳон чемпиони Аргентина ўз унвонини ҳимоя қилиш учун майдонга тушади. Испания эса Европа чемпиони сифатида иккинчи жаҳон чемпионлигини қўлга киритишга ҳаракат қилади.
Бу Жаҳон чемпионати финалида амалдаги жаҳон чемпиони билан амалдаги Европа чемпионининг тўқнашуви сифатида тарихга кириши мумкин. Шунингдек, бу икки терма Жаҳон чемпионатида 1966 йилдан бери биринчи марта ўзаро баҳс олиб бориши мумкин.
Агар Англия финалга чиқса, ЕВРО-2024 финалининг реванши юзага келади. Икки йил аввал Европа чемпионати финалида Испания Англияни мағлуб этган эди. Энди "Уч шерлар" жаҳон чемпионати финалида ўша мағлубият учун қасос олиш имкониятига эга бўлади. Шу билан бирга, бу икки мамлакат тарихда илк бор Жаҳон чемпионати финалида тўқнашиши мумкин.
Ким фаворит?
Испания финалга чиққан бўлса-да, иккинчи ярим финал ғолиби ким бўлишидан қатъи назар ҳал қилувчи баҳс тенг кучлар ўртасида кечиши кутилмоқда. Испания турнирдаги энг ишончли ҳимояга эга жамоалардан бири бўлиб турибди. Аргентина чемпионлик тажрибасига таянса, Англия мувозанатли ва барқарор ўйини билан хавфли рақиб ҳисобланади.
Жаҳонгир Сотволдиев
Изоҳ