Эртага жаҳон чемпионати гуруҳ босқичининг сўнгги турида Ўзбекистон миллий терма жамоаси Конго ДРга қарши майдонга тушади. Бу икки жамоа учун ҳам ҳал қилувчи учрашув ҳисобланади. Конголиклар кейинги босқичга чиқиш имкониятини сақлаб қолиш учун фақат ғалабага муҳтож бўлса, Ўзбекистон мундиалдаги илк очко ва илк ғалабасини қўлга киритиш ҳамда кичик бўлса-да плей-офф умидини сақлаб қолишни кўзлаб ҳаракат қилади.
Ўзбекистон: ҳужумда имконият бор, аммо ҳимоя ташвишли
Фабио Каннаваро шогирдлари илк икки турда Колумбия ва Португалияга қарши баҳсларда нисбатан яхши ўйин намойиш этган бўлса-да, натижага эриша олмади. Айниқса, ҳимоядаги хатолар ва стандарт вазиятлардаги муаммолар қимматга тушди.
Шунга қарамай, Ўзбекистон МТЖ таркибида ўйин тақдирини ҳал қила оладиган футболчилар етарли. Элдор Шомуродовнинг тажрибаси, Абдуқодир Ҳусановнинг ҳимоядаги ишончли ўйини ҳамда ярим ҳимоядаги тезкор комбинациялар жамоанинг асосий қуроли бўлиб қолмоқда.
Каннаваро учун энг муҳим вазифа — ҳимоя ва ҳужум ўртасидаги мувозанатни тиклаш. Чунки Конгога қарши ҳаддан ташқари очиқ футбол ўйнаш хавфли бўлиши мумкин.
Конго ДР: жисмоний куч ва тезлик асосий қурол
Африка вакили турнирда яхши таассурот қолдирди. Улар Португалиядан очко олди, Колумбияга эса битта тўп фарқи билан имкониятни бой берди. Бу жамоанинг тартибли ҳимоя ва қарши ҳужумларда хавфли эканини кўрсатди.
Конго таркибида АПЛ ва Европанинг кучли чемпионатларида фаолият олиб борадиган тажрибали футболчилар бор. Айниқса, Йоан Висса ва Седрик Бакамбу каби ҳужумчилар ҳар қандай ҳимоя учун жиддий хавф туғдиради. Мураббий Себастьен Десабр ҳам бу сафар жамоаси ҳужумкорроқ ўйнашини маълум қилди.
Тактик кураш
Бу баҳсда тўп назорати эҳтимолан Ўзбекистон томонида бўлади. Конго эса ҳимоядан тез чиқиш ва қанотлар орқали ҳужум қилишга ҳаракат қилади.
Ўзбекистоннинг устун томонлари:
тўп билан яхши ўйнай олиши;
қисқа узатмалар орқали комбинациялар;
техник жиҳатдан устун ярим ҳимоя.
Конгонинг афзалликлари:
жисмоний куч;
ҳаводаги курашларда устунлик;
қарши ҳужумларда юқори тезлик;
индивидуал маҳорат.
Кимнинг имконияти юқори?
Қоғозда Конго ДР фаворит ҳисобланади. Жамоа ҳимояда анча барқарор ўйин кўрсатади ва ҳужумда тажрибали ижрочиларга эга. Шу билан бирга, Ўзбекистоннинг ҳам рақибни ҳайратда қолдириш имконияти бор. Агар Каннаваро шогирдлари ҳимояда интизомли ўйнаб, мавжуд вазиятлардан самарали фойдалана олса, тарихий ғалабани қўлга киритиши мумкин.
Хулоса
Бу нафақат 3 очко, балки икки мамлакат футбол тарихи учун ҳам муҳим ўйин. Конго ДР кейинги босқич ҳақида ўйлаяпти, Ўзбекистон эса Жаҳон чемпионатидаги дебют иштирокини муносиб якунлаш ва мухлисларга илк ғалабани совға қилишни истайди. Шу боис Атлантадаги баҳс гуруҳ босқичининг энг муросасиз учрашувларидан бири бўлиши кутилмоқда.
Жаҳонгир Сотволдиев АҚШдан махсус
Изоҳ