Италиялик мутахассиснинг таъкидлашича, қуръа натижалари маълум бўлганидан кейинёқ Ўзбекистонни мураккаб гуруҳ баҳслари кутаётгани аниқ эди.
«Албатта, Жаҳон чемпионатидаги илк иштирок осон кечмаслиги табиий. Қуръа натижалари чиққанидан сўнг Колумбия ва Португалияни кўриб, бизни жуда қийин гуруҳ кутаётганини билгандик», — деди Каннаваро.
Бош мураббий Португалияга қарши йирик ҳисобдаги мағлубиятга қарамасдан, футболчиларнинг ҳаракатларидан мамнун эканини қайд этди.
«Колумбияга қарши ўйиндан кейин ҳам жамоамдан фахрланишимни айтгандим, бугун ҳам жамоам билан фахрланаман. Ҳа, улар қийинчиликларга дуч келишди, аммо бир сония ҳам таслим бўлишмади», — дея таъкидлади мутахассис.
Каннаваро Португалия каби юқори савияли футболчиларга эга жамоага қарши ўйнаш осон эмаслигини ҳам қайд этди.
«Барча чизиқларда юқори савиядаги футболчиларга эга жамоага қарши ўйнаш доим қийин. Шубҳасиз, улар майдонга жуда катта мотивация билан тушишган эди. Бироқ бу Жаҳон чемпионати биз учун тажриба вазифасини ўтамоқда», — деди Ўзбекистон терма жамоаси бош мураббийи.
Эслатиб ўтамиз, Ўзбекистон МТЖнинг гуруҳдаги сўнгги ўйини Конго терма жамоасига қарши 28 июнь куни бўлиб ўтади.
Изоҳ