Тошкент метросида аёлга тегажонлик қилган шахс қамалди

2026 йил 21 апрель куни Тошкент шаҳар жиноят ишлари бўйича Шайхонтоҳур туман судида маъмурий иш кўриб чиқилди.

Суд ҳужжатларига кўра, 2001 йилда туғилган Ш.Т. 2026 йил 3 апрель куни Тошкент метрополитенининг “Пахтакор” бекатида поездга чиқиш вақтида 1999 йилда туғилган аёлга нисбатан тегажонлик қилган. У одам кўплигидан фойдаланиб, жабрланувчининг белидан пастки қисмига теггани аниқланган.

Жабрланувчи ҳолатга қаршилик билдириб, ундан қўлини олишни талаб қилган. Шундан сўнг ҳуқуқбузар поезддан чиқиб кетмоқчи бўлган, аммо кейинги бекатда жабрланувчи “102” хизматига мурожаат қилган ва у ички ишлар органлари ходимлари томонидан ушланган.

Суд мажлисида Ш.Т. айбини қисман тан олиб, қилмишидан пушаймон эканини билдирган. Бироқ жабрланувчи уни кечирмаслигини ва қонуний чора кўрилишини сўраган.

Суд барча далилларни кўриб чиқиб, ушбу ҳаракатни Ўзбекистон Республикаси Маъмурий жавобгарлик тўғрисидаги кодексининг 411-моддаси 1-қисми билан тўғри квалификация қилди.

Қарорга кўра, Ш.Т. айбдор деб топилиб, унга нисбатан 5 сутка маъмурий қамоқ жазоси тайинланди.