Синоптиклар март ойида ўзбекистонликларни қандай об-ҳаво кутаётганини айтди

"Ўзгидромет" хабарига кўра, март ойи бошида об-ҳаво баҳорги беқарор бўлади.

Баҳорнинг биринчи кунида аксарият вилоятларда ҳаво ҳарорати +12...+17 даража бўлган қуруқ об-ҳаво бўлиши кутилмоқда.

2 март куни Ўзбекистон ҳудудига жануби-ғарбдан нам ҳаво кириб келиши бошланади. Республика бўйича ёмғир ёғади, тоғли ҳудудларда ёмғир ва қор кўринишидаги ёғингарчилик бўлади.

Келгусида биринчи ўн кунликнинг охиригача ёғингарчилик даврий характерга эга бўлади: текислик ҳудудларда вақти-вақти билан ёмғир ёғади, тоғларда ёмғир ва қор ёғади. Ушбу даврда ҳаво ҳарорати +10...+15 даража атрофида бўлиши кутилмоқда, бу иқлимий меъёрларга мос келади, айрим кунларда +6...+9 даражагача пасайиши мумкин.

Март ойининг иккинчи ва учинчи ўн кунликларида ҳарорат кечалари +3...+8 дан +8...+13 даражагача, кундуз кунлари +12...+17 дан +23...+28 даражагача ўзгариб туриши кутилмоқда.

Март ойида ҳароратнинг пасайиш даври тобора қисқариб, исиш даври эса узоқроқ давом этади.