Тошкентда эр-хотин косметологлар фуқароларнинг юзини ноқонуний пластик жарроҳлик амалиётини ўтказгани бўйича шов-шувли жиноят ишини кўриб чиқиш якунланди. Жиноят ишлари бўйича Чилонзор туман суди томонидан ҳукм чиқарилган.
Сўнгги пайтларда ижтимоий тармоқларда косметологларнинг бир муолажа эвазига ёшартириш ва ўзгартиришни ваъда қилувчи рекламалари сони кескин ошди. Бироқ, жозибадор таклифлар ортида кўпинча тиббий маълумотнинг етишмаслиги ва оддий хавфсизлик меъёрларининг қўпол равишда бузилиши яширинган.
Аниқланишича, косметологик хизмат кўрсатган эр-хотин аслида пластик жарроҳлик билан шуғулланиб, бунинг учун лицензияси ҳам, тегишли малакаси ҳам бўлмаган. Операциялар антисанитария шароитида ўтказилган, бу эса беморларнинг соғлиғи учун оғир оқибатларга олиб келган.
Судда жабрланувчилардан бирининг шокка туширадиган кўрсатмалари эшитилди. Унинг сўзларига кўра, "ёшартирувчи операция" антисанитария шароитида ўтказилган, эркак эса кесмаларни маст ҳолатда амалга оширган. Операция тун бўйи давом этган, шундан сўнг аёл беш кун комада бўлган. Унда оғир яллиғланиш ривожланган, йиринглаш бошланган, неврологик асоратлар пайдо бўлган: юзнинг бир қисми сезувчанлигини йўқотган, кўзлари юмилмай қолган, қўлларида оғриқ ва шишлар пайдо бўлган.
Жабрланувчи операция оқибатларининг фотосуратларини судга тақдим этди. Мустақил пластик жарроҳларнинг айтишича, чоклар арзон иплар билан қўйилган, инфекция янада тарқалса, ўлим билан якунланиши мумкин. Аёлнинг юзини тиклаш учун тахминан 70 миллион сўмлик такрорий мураккаб операция талаб этилади.
Текширув давомида эркакнинг махсус маълумоти йўқлиги ва фақат ўрта мактабни тамомлагани маълум бўлди. Судланувчи Москвада ўқиганини, бироқ рус тилини билмаслигини, тақдим этилган диплом эса унинг ҳақиқийлигига шубҳа туғдиргани айтилди. Суд материалларига кўра, аёл бир неча марта исм ва фамилиясини ўзгартирган.
Судланувчининг ўзи ишламаслиги ва оиласи билан шуғулланиши ҳақидаги иддаоларига қарамай, мижозлардан қўнғироқларни қабул қилиб, уларга 200 доллар эвазига блефаропластика таклиф қилиб, фаолиятини давом эттираётгани аниқланган. Хизматлардан нафақат Ўзбекистон, балки арзон нархлардан манфаатдор бўлган Тожикистон ва Қозоғистон фуқаролари ҳам фойдаланган.
Суд эркакни ЖКнинг 186-моддаси 2-қисми "б," "в," ҳамда "г" бандлари (хавфсизлик талабларига жавоб бермайдиган ишларни бажариш ёки хизматлар кўрсатиш) билан айбдор деб топиб, суд залида қамоққа олиш билан уч йилга озодликдан маҳрум қилди. Аёлга 3 йил муддатга озодликни чеклаш жазоси тайинланди.
Судланувчи сўнгги сўзини айтар экан, пушаймонлигини айтиб, таълим олишга ва ўқишни давом эттиришга ваъда берди.
Изоҳ