Банклар ва тўлов ташкилотларининг мобил иловаларида банк карталарини улаш хавфсизлиги ва тартибига қўшимча талабларни белгиловчи низом рўйхатдан ўтказилди.
Унга кўра, мобил иловада рўйхатдан ўтган фойдаланувчи ўз аккаунтига фақат ўзига ёки яқин қариндошларига тегишли банк ҳисобварақлари, банк карталари ва электрон ҳамёнларни бириктириши, шунингдек, ушбу аккаунт орқали P2P ўтказмаларини амалга ошириши мумкин.
Бунда фойдаланувчининг телефон рақами ва ЖШШИР мувофиқлиги текширилади. Мослик бўлмаса, мобил иловада рўйхатдан ўтиш ва банк картасини бириктиришга рухсат берилмайди.
Кредит ва тўлов ташкилотлари "тириклик белгилари"ни аниқлаган ҳолда биометрик идентификатсиялашни амалга оширишлари шарт, яъни фотосурат бўйича идентификатсиялашга йўл қўйилмайди.
Агар телефонга юборилган бир марталик СМС-код уч марта нотўғри киритилган бўлса, фойдаланувчининг мобил иловадаги ҳаракатлари вақтинча 15 дақиқага чекланади.
Мобил илова ҳисобига бошқа қурилмадан кирилса ёки пароль тикланса, ҳисобингизга бириктирилган барча банк карталари иловадан автоматик ўчириб ташланади.
Шунингдек, ушбу қурилмада банк карталари бўйича молиявий операциялар тарихи ўчириб ташланади.
Таъкидланишича, банк карталарини бириктириш фақат биометрик идентификациядан ўтгандан сўнг амалга оширилади.
Изоҳ