Ички ишлар вазирлиги аввалроқ ёниб кетган уйини тиклаш учун маблағ йиғилишини эълон қилган 19 ёшли блогернинг автомобиль сотиб олиши билан боғлиқ вазиятга изоҳ берди.
Декабрь ойи бошида қиз ижтимоий тармоқларда уйи ёниб кетгани акс этган видеони эълон қилганди. У обуначиларига мурожаат қилиб, уй-жойини тиклаш учун маблағ йиғишда ёрдам сўради.
Орадан вақт ўтиб, у янги видео жойлаштирди ва унда Kia автомобилини ўзи сотиб олганини айтди. Мазкур видео кенг жамоатчилик эътирозига ва ижтимоий тармоқларда муҳокамалар тўлқинига сабаб бўлди. Кейинроқ қиз яна бир мурожаатини эълон қилиб, автомобиль совға қилинганини тан олган.
ИИВнинг қайд этишича, қиз профилактик суҳбат ўтказиш учун ички ишлар органларига таклиф қилинган.
"У бу ишни айнан обуначилари сонини кўпайтириш ва ижтимоий тармоқларда моддий ёки бошқа манфаат кўриш мақсадида қилганини тан олди.Аммо бугунги кунга қадар унинг хатти-ҳаракатлари устидан шикоят келиб тушмади. Агар унинг хатти-ҳаракатларидан норози бўлган ёки моддий манфаатлари бузилаётганини билдирган фуқаролардан мурожаат келиб тушса, биз бу масалани албатта кўриб чиқамиз ва тегишли чораларни кўрамиз," - деди ИИВ матбуот котиби Шоҳрух Ғиёсов.
Блогерларнинг тушунтиришича, бундай ҳаракатлар сунъий ижтимоий резонанс ва аҳолининг ўта салбий реакциясини келтириб чиқаради.
Изоҳ