Жорий йилнинг 28 ноябрь куни соат 10:25 ларда Фарғона шаҳар ИИБ навбатчилик қисмининг берган хабарига кўра, Фарғона шаҳар, “Қиргули” МФЙда жойлашган Фарғона нефтни қайта ишлаш заводи(ФНҚЗ) ҳудудида жойлашган 12-сонли ишлаб чиқариш цехининг ер майдонига тахминан 3-6 ойлик бўлган ҳомила кўмиб кетилганлиги аниқланган. Бу ҳақда Бош прокуратура UzNews.uz'га хабар қилди.
Мазкур ҳолат юзасидан ҳодиса содир бўлган жойга шаҳар прокурори раҳбарлигидаги тезкор-тергов гуруҳи чиқиб, ҳодиса жойи ва ўлик ҳомила кўздан кечирилган ҳамда воқеа жойи, яъни ҳомила кўмиб кетилган ердан қонга ўхшаш доғлар ашёвий далил тариқасида олинган.
Аниқланишича, шу йилнинг 28 ноябрь куни соат 10:00 ларда ФНҚЗ ҳудудининг 12-цехнинг автомобиль тўхташ жойидаги ер майдонида дайди ит томонидан ерни ковлаб олиши натижасида ҳомилани аниқлаб, ернинг устига чиқариб қўйганлигини кўриб қолган цех ишчилари тегишли тартибда бу ҳақда хабар беришган.
ФНҚЗ ҳудудидан топилган ўлик ҳомиланинг ўлими сабаби ва тан жароҳатларини аниқлаш учун ўтказилган суд-тиббий экспертизасининг дастлабки маълумотномасида, “она қорнидаги ўлик ҳомила, ҳомила ичи инфекцияси, ҳомила ичи гипокцияси, ўғил бола жинсига мансуб 3-4 ойлик ҳомила эканлиги” қайд этилган.
Ўлик ҳомиланинг генетик материаллари ҳақидаги маълумотларини олиш ва сақлаш, базадаги мавжуд генетик материаллар билан солиштириб, унинг ота-онасини аниқлаш учун одамнинг генетик материаллари суд-биологик экспертизаси тайинланган.
Ҳозирда ўлик ҳомиланинг онасини топиш бўйича суриштирув ишлари олиб борилмоқда.
Шунингдек, аборт ёки ҳомилани сунъий туширишдан кейин тиббий ёрдамга мурожаат қилган аёллар ҳамда ФНҚЗ ходимларини аниқлаш мақсадида вилоят Соғлиқни сақлаш бошқармаси ва шаҳар ИИБга алоҳида топшириқлар юборилган.
Мазкур ҳолат юзасидан Фарғона шаҳар прокуратураси томонидан терговга қадар текширув ҳаракатлари олиб борилмоқда, текширув устидан назорат ўрнатилган.
Изоҳ