Экология, атроф-муҳитни муҳофаза қилиш ва иқлим ўзгариши вазирлиги атмосфера ҳавоси муҳофазасини кучайтириш ва иқлим ўзгаришларига боғлиқ хавфларни камайтириш борасидаги чора-тадбирларни давом эттирмоқда.
Ҳозирда вазирлик «Тошкент шаҳри ва Тошкент вилоятида ҳаво ифлосланишининг олдини олиш ва иқлим ўзгаришининг оқибатларини юмшатиш бўйича қўшимча чора-тадбирлар» қарор лойиҳасини ишлаб чиқиб, Вазирлар Маҳкамасига тақдим этди.
Лойиҳа ҳудуддаги энг долзарб экологик муаммолардан бири — саноат корхоналари ва иссиқхона хўжаликларидан келиб чиқадиган ифлословчи моддалар чиқариш даражасининг юқорилигини ҳал этишга қаратилган. Ҳужжат атмосферага салбий таъсирни камайтириш ва корхоналарнинг экологик жиҳатдан тоза технологияларга босқичма-босқич ўтишини таъминлашга қаратилган комплекс чоралар тизимини кўзда тутади.
Хусусан, қуйидаги чора-тадбирлар режалаштирилган:
— Ҳудуддаги саноат корхоналари ва иссиқхоналарда чанг ва газ тозалаш ускуналарини ўрнатиш;
— Иссиқхоналарда мавжуд қозонларни, уларнинг амалдаги талабларга жавоб бермаслигини ҳисобга олиб, замонавий энергия самарадор ва экологик тоза тизимлар билан алмаштириш;
— Иссиқхона ва саноат обектларини кўмирни ишлатмасдан бошқа алтернатив энергия манбаларига ўтказиш;
— Корхоналарга ишлаб чиқаришни модернизатсия қилиш, ташламаларни тозалаш тизимларини, маҳаллий тозалаш иншоотларини, автоматик ҳаво мониторинги стансияларини ўрнатиш учун молиявий рағбатлар тақдим этиш, шу жумладан, грант механизмлари ёрдамида.
Ушбу чора-тадбирларни амалга ошириш ифлослантирувчи моддалар чиқарилишини сезиларли даражада камайтиришга, экологик хавфсизликни оширишга ҳамда Тошкент шаҳри ва Тошкент вилояти аҳолиси учун янада қулай яшаш шароитларини яратишга ёрдам беради. Шунингдек, экологик талабларни кучайтириш мамлакатнинг иқлим барқарорлиги ва «яшил» иқтисодиётга ўтиш стратегиясининг муҳим қисмидир.
Изоҳ